اردوورلڈ کینیڈا( ویب نیوز) اونٹاریو کے پریمیئر ڈگ فورڈ نے وفاقی سطح پر متوقع وزیرِاعظم اور لبرل پارٹی کے نئے قائد مارک کارنی سے مطالبہ کیا ہے کہ وہ قوم کی تعمیرکے منصوبوں کے تحت ہائی وے 401 سرنگ کو اولین ترجیح دیں۔
ان کا کہنا ہے کہ یہ منصوبہ نہ صرف معاشی ترقی کے لیے اہم ہے بلکہ کینیڈا کے بنیادی ڈھانچے کو جدید خطوط پر استوار کرنے میں بھی سنگِ میل ثابت ہوگا۔
پریس کانفرنس کے دوران بات کرتے ہوئے ڈگ فورڈ نے کہا یہ صرف اونٹاریو کا نہیں پورے کینیڈا کا منصوبہ ہے۔
اگر ہم واقعی قوم کی تعمیر کے عزم پر کاربند ہیں، تو 401 سرنگ کی توسیع اور جدید کاری کو فوری بنیادوں پر شروع کرنا ہوگا۔
انہوں نے مزید کہا کہ سرنگ کی تعمیر سے نہ صرف سفری سہولتیں بہتر ہوں گی بلکہ مال برداری، کاروبار اور ٹرانسپورٹیشن کے شعبے میں بھی نمایاں بہتری آئے گی۔
ہائی وے 401، جسے بعض اوقات کینیڈا کی شہ رگ بھی کہا جاتا ہے، ملک کی مصروف ترین شاہراہوں میں سے ایک ہے۔ سرنگ کی تجویز دی گئی توسیع کا مقصد بین الاقوامی سرحدی آمد و رفت کو آسان بنانا، حفاظت کو بہتر کرنا، اور ماحولیاتی اثرات کو کم کرنا ہے
ڈگ فورڈ نے زور دیا کہ یہ وقت سیاسی اختلافات سے بالاتر ہو کر کام کرنے کا ہے۔”ہمیں وفاقی و صوبائی سطح پر مل کر وہ فیصلے کرنے ہوں گے جو آئندہ نسلوں کے لیے ایک مضبوط، محفوظ اور خوشحال کینیڈا کی بنیاد رکھیں۔
