اردوورلڈکینیڈا( ویب نیوز)غزہ میں جاری انسانی بحران اور فلسطینی عوام کے خلاف مبینہ نسل کشی پر دنیا بھر میں آوازیں اٹھ رہی ہیں اور اب ہالی ووڈ کی نامور شخصیات بھی کھل کر اس مسئلے پر بات کرنے لگی ہیں۔ آسکر ایوارڈ یافتہ اداکارہ جینیفر لارنس اور ہیری پوٹر سیریز سے شہرت حاصل کرنے والی ایما واٹسن نے اپنے بیانات میں فلسطینی عوام سے اظہارِ یکجہتی کیا اور عالمی برادری سے فوری ایکشن لینے کا مطالبہ کیا۔
غیر ملکی میڈیا کے مطابق جینیفر لارنس نے ایک حالیہ انٹرویو میں کہا کہ غزہ میں جو کچھ ہو رہا ہے وہ کھلی نسل کشی ہے اور یہ ناقابل قبول ہے۔ انہوں نے زور دیا کہ دنیا کو اس معاملے پر مزید خاموش نہیں رہنا چاہیے اور انسانیت کے ناطے فوری طور پر جنگ بندی اور امداد کی فراہمی یقینی بنانی چاہیے۔ جینیفر لارنس نے سوشل میڈیا پر بھی ایک پوسٹ میں لکھا کہ ’’ہمیں اپنی آواز بلند کرنی ہوگی تاکہ بے گناہ بچوں اور عورتوں کی جانیں بچ سکیں۔‘‘
دوسری جانب ایما واٹسن نے ایک تقریب میں گفتگو کرتے ہوئے کہا کہ غزہ پر بات کرنے والے لوگ بھی خود کو غیر محفوظ محسوس کرتے ہیں جو کہ ایک خطرناک صورتحال کی عکاسی کرتا ہے۔ ان کا کہنا تھا کہ انسانی حقوق پر بات کرنا کبھی خطرہ نہیں ہونا چاہیے، اور دنیا کو ایسے ماحول کے خلاف کھڑا ہونا ہوگا جہاں ظلم پر بات کرنے کو دبایا جائے۔
ایما واٹسن نے مزید کہا کہ وہ امید کرتی ہیں کہ دنیا کے لیڈرز اور عالمی ادارے اس صورتحال کو سنجیدگی سے لیں گے اور ایسے اقدامات کریں گے جو انسانی جانوں کو بچا سکیں۔
ماہرین کا کہنا ہے کہ عالمی سطح پر مشہور شخصیات کی آواز بلند ہونا رائے عامہ کو ہموار کرنے میں اہم کردار ادا کرتا ہے اور اس سے حکومتوں پر دباؤ بڑھ سکتا ہے کہ وہ اس مسئلے کے حل کے لیے عملی اقدامات کریں۔
غزہ میں جاری تنازع کے باعث اقوام متحدہ اور انسانی حقوق کی تنظیمیں بارہا خبردار کر چکی ہیں کہ وہاں انسانی بحران شدت اختیار کر رہا ہے اور خوراک، پانی اور دواؤں کی کمی صورتحال کو مزید سنگین بنا رہی ہے۔
