اردو ورلڈ کینیڈا ( ویب نیوز)وزیر داخلہ رانا ثنا اللہ خان نے پی ٹی آئی رہنما شہباز گل پر پولیس حراست میں تشدد کے الزامات کو مسترد کر دیا۔اتوار کو اسلام آباد میں نیوز کانفرنس سے خطاب کرتے ہوئے انہوں نے کہا کہ مسلم لیگ ن کسی بھی قسم کے تشدد کے خلاف ہے۔ انہوں نے کہا کہ ہماری حکومت سمجھتی ہے کہ تشدد ایک آدمی کے وقار کے خلاف اور آئین کی خلاف ورزی ہے۔وفاقی وزیر نے کہا کہ شہباز گل پر تشدد کی کہانی اصل معاملے سے توجہ ہٹانے کا ڈرامہ ہے۔انہوں نے کہا کہ شہباز گل کے خلاف فوجی افسران اور جوانوں کو اکسانے پر قانون کے مطابق ایف آئی آر درج کرائی گئی۔ انہوں نے کہا کہ ریاست ایسی مذموم سازشوں کو برداشت نہیں کر سکتی۔وفاقی وزیر نے کہا کہ شہباز گل کو چوبیس گھنٹے کے اندر جوڈیشل مجسٹریٹ کے سامنے پیش کیا گیا اور وہ بالکل ٹھیک ہیں اور انہوں نے تشدد کی شکایت نہیں کی۔ انہوں نے کہا کہ رواں ماہ کی 11 تاریخ کو میڈیکل بورڈ نے اپنی رپورٹ میں کسی تشدد کی نشاندہی نہیں کی۔ انہوں نے کہا کہ شہباز گل پر اسلام آباد پولیس نے تشدد نہیں کیا۔انہوں نے کہا کہ پی ٹی آئی نے عمران خان کے کہنے پر لسبیلہ کے شہدا کے خلاف مہم چلائی۔