اردوورلڈ کینیڈا( ویب نیوز)وفاقی وزیر داخلہ نے نیکٹا اور صوبوں کے درمیان ہم آہنگی کو بہتر بنانے کا فیصلہ کیا ہے جبکہ موثر ہم آہنگی کے لیے نیشنل فیوژن سینٹر قائم کیا گیا ہے۔.
قومی ایکشن پلان کی رابطہ کمیٹی کا ایک اہم اجلاس وفاقی وزیر داخلہ محسن نقوی کی سربراہی میں منعقد ہوا جس میں بریفنگ دی گئی کہ اس سال اکتوبر تک انٹیلی جنس پر مبنی 7984 کارروائیوں میں 206 دہشت گرد مارے گئے۔.
اجلاس میں فیصلہ کیا گیا کہ سوشل میڈیا پر کالعدم دہشت گرد تنظیموں کی سرگرمیوں کو روکنے کے لیے جامع اقدامات کیے جائیں جبکہ پی ٹی اے کے تعاون سے دہشت گرد گروپوں کے اکاؤنٹس کو بلاک کیا جائے گا۔. صوبے غیر قانونی سمز کو روکنے کے لیے جامع حکمت عملی کے تحت اقدامات کریں گے۔.
آئندہ اجلاس میں پی ٹی اے سمیت تمام متعلقہ اداروں کے اعلیٰ عہدیداروں کو ایک موثر طریقہ کار پیش کرنے کی ہدایت کی گئی۔.
وزیر داخلہ محسن نقوی نے کہا کہ بلوچستان اور خیبرپختونخوا میں دہشت گردی کے حالیہ واقعات انتہائی افسوسناک اور قابل مذمت ہیں۔. دہشت گردی سے نمٹنے کے لیے وہ بلوچستان اور خیبرپختونخوا میں انسداد دہشت گردی فورس کی پیشہ ورانہ صلاحیتوں کو بہتر بنانے کے لیے مکمل تعاون فراہم کریں گے۔.
محسن نقوی نے کہا کہ دہشت گردی سے نمٹنے کے لیے پولیس اور فرنٹیئر کانسٹیبلری کو مضبوط کیا جائے گا، امن و امان کی صورتحال کو بہتر بنانے کے لیے سب کو مل کر کام کرنا ہوگا جبکہ تمام صوبوں کی پولیس کو صلاحیت سازی کے ساتھ جدید بنایا جائے گا۔
