اردو ورلڈ کینیڈا ( ویب نیوز ) کینیڈا میں دو کھیلوں کو قومی حیثیت حاصل ہے آئس ہاکی اور لیکروس یہ دونوں کھیل 12 مئی 1994 کو کینیڈا کی پارلیمنٹ کے منظور کردہ ایک قانون "نیشنل اسپورٹس آف کینیڈا ایکٹ” کے تحت باضابطہ طور پر قومی کھیل قرار دیے گئے۔

آئس ہاکی( سرمائی کھیل )
قانون کے مطابق آئس ہاکی کو سرمائی (سردیوں کا) کا قومی کھیل تسلیم کیا گیا۔ آئس ہاکی 19ویں صدی کے آخر میں کینیڈا کے شہر مونٹریال میں ابھرا، اور تیزی سے قومی شناخت کا حصہ بن گیا۔ کینیڈا نے آئس ہاکی میں کئی بین الاقوامی اعزازات جیتے ہیں، جس کی بدولت یہ کھیل ملک بھر میں مقبول ترین کھیل بن چکا ہے۔
آئس ہاکی کے قوانین
آئس ہاکی برف پر کھیلا جاتا ہے اور یہ ایک تیز رفتار اور جسمانی کھیل ہے۔ ہر ٹیم میں 6 کھلاڑی ہوتے ہیں جن میں ایک گول کیپر، دو دفاعی اور تین فارورڈ کھلاڑی شامل ہوتے ہیں۔ میچ تین پیریڈز پر مشتمل ہوتا ہے، ہر پیریڈ بیس منٹ کا ہوتا ہے۔ کھلاڑی ایک چھوٹے ربڑ کے ٹکڑے کو، جسے پک کہا جاتا ہے، مخالف ٹیم کے گول میں ڈالنے کی کوشش کرتے ہیں۔ کھیل کے میدان کو آئس رِنک کہا جاتا ہے، جس پر مخصوص لائنیں اور زون بنے ہوتے ہیں۔ فاؤلز جیسے آف سائیڈ، آئسنگ، ہائی اسٹکنگ اور ہولڈنگ پر کھلاڑیوں کو چند منٹ کے لیے باہر بھیجا جا سکتا ہے، جسے پینالٹی کہتے ہیں۔ اگر میچ برابر ہو جائے تو اوور ٹائم اور پھر شوٹ آؤٹ کے ذریعے فیصلہ کیا جاتا ہے۔
لیکروس( گرمائی کھیل )
دوسری جانب لیکروس، کینیڈا کا قدیم ترین کھیل ہے، جو صدیوں پہلے یہاں کے فرسٹ نیشنز (مقامی قبائل) کھیلا کرتے تھے۔ یہ کھیل کینیڈا کی ثقافتی وراثت کی علامت ہے، اور 19ویں صدی میں اسے باضابطہ کھیل کی شکل دی گئی۔ دلچسپ بات یہ ہے کہ 1859 میں کینیڈا کے پہلے وزیرِاعظم سر جان اے میکڈونلڈ نے لیکروس کو "قومی کھیل” قرار دیا تھا، اگرچہ اس وقت یہ قانونی حیثیت نہیں رکھتا تھا۔ آخرکار 1994 میں دونوں کھیلوں کو ان کی تاریخی و موسمی اہمیت کے مطابق سرکاری طور پر قومی کھیلوں کا درجہ دے دیا گیا، جس سے کینیڈا کی کھیلوں کی پہچان کو مزید تقویت ملی۔
لیکروس کے قوانین
لیکروس کی جڑیں ملک کے قدیم مقامی قبائل (فرسٹ نیشنز) سے جڑی ہوئی ہیں۔ یہ کھیل ایک لمبے میدان میں کھیلا جاتا ہے جہاں ہر ٹیم کے 10 کھلاڑی شامل ہوتے ہیں: تین اٹیکرز، تین مڈفیلڈرز، تین ڈیفنس اور ایک گول کیپر۔ کھلاڑی ایک خاص چھڑی (لیکروس اسٹک) کی مدد سے چھوٹی گیند کو حریف کے گول میں ڈالنے کی کوشش کرتے ہیں۔ میچ چار کوارٹرز پر مشتمل ہوتا ہے اور ہر کوارٹر 15 منٹ کا ہوتا ہے۔ فیلڈ لیکروس میں مخصوص ضوابط ہوتے ہیں جیسے "آف سائیڈ رول” کے تحت صرف چھ کھلاڑی مخالف ہاف میں ہو سکتے ہیں، جبکہ "باکس لیکروس” میں چھوٹے میدان میں 6 کھلاڑیوں کی ٹیم ہوتی ہے۔ کھیل میں فاؤلز جیسے سلیشنگ، ہولڈنگ یا کراس چیکنگ پر کھلاڑیوں کو پینالٹی باکس بھیجا جاتا ہے۔
آئس ہاکی اور لیکروس دونوں ہی کھیل نہ صرف کینیڈا کی ثقافت اور موسم کی نمائندگی کرتے ہیں بلکہ نوجوانوں کو جسمانی فٹنس، ٹیم ورک، اور اسپورٹس مین اسپرٹ سکھاتے ہیں۔ ان دونوں کھیلوں کے قوانین نہایت منظم اور عالمی سطح پر تسلیم شدہ ہیں، اور کینیڈا نے ان میں بین الاقوامی سطح پر بھی کئی اعزازات حاصل کیے ہیں۔