اردو ورلڈ کینیڈا ( ویب نیوز)بحیرہ عرب میں سمندری طوفان بائپر جوئے شدت اختیار کر گیا، کراچی میں 14 اور 15 جون کو تیز ہوائوں کے ساتھ بارش ہو سکتی ہے۔
محکمہ موسمیات کے مطابق طوفان شمال کی جانب بڑھ رہا ہے اور اس وقت کراچی سے 600 کلومیٹر جنوب اور ٹھٹھہ سے 580 کلومیٹر جنوب میں ہے۔ طوفان کی وجہ سے سمندر میں ہوا کی رفتار 180 سے 220 کلومیٹر فی گھنٹہ کے درمیان ہے۔ماہرین کے مطابق 14 جون تک یہ سمندری طوفان شمال کی جانب بڑھے گا اور 15 جون کی سہ پہر یہ طوفان جنوب مشرقی سندھ اور بھارتی گجرات سے گزر جائے گا۔ 15 جون کی صبح تک یہ طوفان کیٹی بندر اور بھارتی گجرات کے درمیان ٹکرا سکتا ہے۔
محکمہ موسمیات کے مطابق طوفان کے باعث ساحلی پٹی پر آندھی اور گرج چمک کے ساتھ موسلادھار بارش ہوسکتی ہے، جنوب مشرقی سندھ میں چند مقامات پر موسلادھار بارش بھی ہوسکتی ہے جب کہ ٹھٹھہ، سجاول، بدین، تھرپارکر میں موسلادھار بارش کا امکان ہے۔ اور عمرکوٹ میں 13 سے 17 جون تک جب کہ ان علاقوں میں ہوا کی رفتار 80 سے 100 کلومیٹر فی گھنٹہ ہوسکتی ہے۔
چیف میٹرولوجسٹ سردار سرفراز نے بتایا کہ طوفان کی سمت کا فیصلہ کیا گیا ہے کہ یہ شمال مشرق کی جانب رہے گا، طوفان 15 جون کو کیٹی سے ٹکرائے گا، طوفان جن علاقوں سے گزرے گا وہاں 300 سے 400 ملی میٹر بارش ہونے کا امکان ہے۔ جنوب مشرقی سندھ میں ٹھٹھہ، سجاول، بدین، میرپورخاص اور گردونواح میں موسلادھار بارش کا امکان ہے۔
سردار سرفراز نے کہا کہ طوفان سے کراچی، حیدرآباد، نواب شاہ سانگھڑ اور ٹنڈو محمد خان میں موسلادھار بارش کا امکان ہے، طوفان کا پھیلائو بہت زیادہ ہے اور ہوائیں بہت تیز ہیں، اس لیے کراچی میں 14 یا 15 جون کو بارش ہوسکتی ہے۔ 70 کلومیٹر فی گھنٹہ کی رفتار سے ہوائیں بھی چل سکتی ہیں۔
چیف میٹرولوجسٹ کا مزید کہنا تھا کہ یہ بہت طاقتور سسٹم ہے جو کراچی کے قریب سے گزرے گا اور شہر میں کم از کم 50 سے 100 ملی میٹر بارش متوقع ہے۔
