اردوورلڈ کینیڈا ( ویب نیوز )دریائے ستلج میں اونچے درجے کے سیلاب سے پنجاب کے مختلف علاقوں عارف والا، بہاولنگر اور چشتیاں میں بستیاں زیر آب آنے کے بعد لودھراں کی دریائی پٹی بھی طغیانی کے دہانے پر ہے۔
دریائے ستلج میں میلسی سائفن کے مقام پر پانی کے بہاؤ میں تیزی سے اضافے سے 40 دیہات اور سینکڑوں دیہات متاثر ہونے کا خدشہ ہے۔
سیلاب کے باعث 24 اسکول بند کردیئے گئے ہیں جبکہ محکمہ تعلیم نے سیلاب سے متاثرہ علاقوں میں تعطیلات میں غیر معینہ مدت تک توسیع کردی ہے۔
ادھر بہاولپور میں دریائی پٹی کی کئی بستیوں سے لوگ محفوظ مقامات پر منتقل ہو گئے ہیں، بورے والا میں پانی کی سطح بڑھنے سے کئی چھوٹے بند ٹوٹ گئے ہیں۔
دریں اثناء پی ڈی ایم اے نے دریائے سندھ میں پانی کی سطح میں اضافے کے باعث الرٹ جاری کر دیا ہے۔
صوبائی ڈیزاسٹر مینجمنٹ اتھارٹی کا کہنا ہے کہ دریائے سندھ اور ستلج میں سیلابی صورتحال ہے، شہری دریاؤں، ندی نالوں میں نہانے اور سیر و تفریح سے گریز کریں۔
پی ڈی ایم اے نے بتایا کہ دریائے ستلج میں ہیڈ اسلام کے مقام پر اونچے اور سلیمانکی اور گنڈا سنگھ میں درمیانے درجے کا سیلاب ہے۔
ترجمان نے کہا کہ دریائے سندھ میں پانی کی سطح بڑھ رہی ہے اور تربیلا کالا باغ چشمہ کے مقام پر دریا میں نچلے درجے کا سیلاب ہے۔
ان کا مزید کہنا تھا کہ دریائے چناب، راوی اور جہلم میں پانی کا بہاؤ معمول پر ہے، پی ڈی ایم اے کنٹرول روم سے صورتحال کو مانیٹر کیا جا رہا ہے۔
