اردوورلڈ کینیڈا ( ویب نیوز)بالی ووڈ کی سپر اسٹار دپیکا پڈوکون کا کہنا ہے کہ وہ قدرتی طور پر خوبصورت ہیں اور پرکشش نظر آنے کے لیے انہوں نے کبھی کوئی سرجری نہیں کروائی۔

بھارتی میڈیا کو دیئے گئے ایک حالیہ انٹرویو میں عالمی شہرت یافتہ اداکارہ دپیکا پڈوکون نے انکشاف کیا ہے کہ انہوں نے آج تک کبھی کوئی سرجری نہیں کروائی۔

اداکارہ نے کہا کہ کیریئر کے آغاز میں ہر اداکارہ کی طرح انہیں بھی اپنی خوبصورتی میں اضافے کے لیے مختلف سرجری کرانے کا مشورہ دیا گیا تھا۔

دیپیکا کا کہنا تھا کہ وہ خود پر اعتماد ہیں، اس لیے انھوں نے اس طرح کے فضول مشوروں پر کبھی توجہ نہیں دی۔

اداکارہ نے انکشاف کیا کہ جب انہوں نے بالی ووڈ انڈسٹری میں قدم رکھا تو ان کی عمر صرف 18 سال تھی، تب کسی نے انہیں پرکشش نظر آنے کے لیے چھاتی کی سرجری کروانے کا مشورہ دیا جب کہ بہت سے لوگوں نے انہیں گوری رنگت کے لیے سرجری کرانے کا مشورہ دیا۔

دپیکا پڈوکون نے ان تمام مشوروں کو بدترین قرار دیتے ہوئے کہا کہ انہوں نے ان مشوروں پر عمل نہ کرکے بہت اچھا کیا، وہ بغیر کسی سرجری کے بھی ایک کامیاب اداکارہ ہیں اور ایسے مشوروں پر عمل نہ کرنے پر وہ خود کی شکر گزار ہیں۔