اردو ورلڈ کینیڈا ( ویب نیوز )ریٹائرڈ آرمی چیف جنرل قمر جاوید باجوہ نے کہا ہے کہ اللہ کا شکر گزار ہوں جس نے مجھے اس عظیم فوج میں خدمات انجام دینے کا موقع دیا، میں جنرل عاصم منیر کو آرمی چیف بننے پر مبارکباد پیش کرتا ہوں، جلد گمنام ہوجائوں گا لیکن فوج سے روحانی تعلق ہمیشہ قائم رہے گا۔
جی ایچ کیو راولپنڈی میں پاک فوج کی کمان کی تبدیلی کی پروقار تقریب سے خطاب کرتے ہوئے سبکدوش ہونے والے آرمی چیف جنرل قمر جاوید باجوہ نے کہا کہ اس فوج نے 6 سالہ دور میں ہمیشہ ہر موقع پر میری آواز پر لبیک کہا۔
اپنی فوج پر فخر ہے جو اپنے کم وسائل کے باوجود سیاچن سے لے کر صحرا تک سرحدوں کی حفاظت کرتی ہے، زبان، رنگ، ذات اور مذہب سے بالاتر ہوکر ملکی سالمیت کا دفاع کرتی ہے۔
جنرل قمر جاوید باجوہ نے کہا کہ جنرل عاصم سے میری دوستی 24 سال پرانی ہے، وہ حافظ قرآن ہونے کے ساتھ ساتھ پروفیشنل، باصلاحیت اور اعلی اصول کے حامل افسر ہیں، مجھے یقین ہے کہ ان کی قیادت میں فوج نئی بلندیاں عبور کرے گی۔ تقرری مثبت ثابت ہوگی، مجھے خوشی ہے کہ میں فوج کی باگ ڈور ایک باوقار اور قابل افسر کو سونپ رہا ہوں، مجھے یقین ہے کہ آنے والے وقت میں فوج جنرل عاصم کی قیادت میں اور بھی ملک کی خدمت کرے گی۔
انہوں نے کہا کہ محدود وسائل کے باوجود پاک فوج ملک کی جغرافیائی سرحدوں کی حفاظت کرتی ہے۔ میری دعائیں پاک فوج کے ساتھ ہوں گی، نئے آرمی چیف جنرل عاصم منیر کے لیے دعاگو ہوں۔
