اردو ورلڈ کینیڈا ( ویب نیوز ) امریکہ میں صدارتی انتخابات ، موجودہ امریکی صدر جو بائیڈن کے صدارتی دوڑ سے دستبردار ہونے کے بعد ڈیموکریٹک پارٹی کی حمایت میں اضافہ دیکھا گیا ہے۔ امریکی ریپبلکن پارٹی کے صدارتی امیدوار ڈونلڈ ٹرمپ نے کہا ہے کہ اگر وہ نومبر میں ہونے والے صدارتی انتخاب میں ہار گئے تو دوبارہ نہیں لڑیں گے۔میڈیا رپورٹس کے مطابق ڈونلڈ ٹرمپ اپنی پارٹی کی جانب سے مسلسل تیسری بار صدارتی انتخابات میں حصہ لے رہے ہیں اور ممکنہ طور پر یہ ان کا آخری الیکشن ہوگا۔
ڈونلڈ ٹرمپ کا کہنا تھا کہ اگر وہ کملا ہیرس سے ہار گئے تو یہ ان کا آخری الیکشن ہوگا، تاہم امید ہے کہ وہ کامیاب ہوں گے۔واضح رہے کہ انتخابات سے قبل کیے گئے مقبولیت کے سروے میں موجودہ امریکی نائب صدر اور ڈیموکریٹک پارٹی کی صدارتی امیدوار کملا ہیرس اور ڈونلڈ ٹرمپ کے درمیان سخت مقابلے کا امکان ہے۔2020 کے صدارتی انتخابات میں جو بائیڈن ڈونلڈ ٹرمپ کو شکست دے کر صدر منتخب ہوئے تھے تاہم ڈونلڈ ٹرمپ نے اپنی شکست تسلیم نہیں کی تھی، اسی دوران 6 جنوری 2021 کو ٹرمپ کی ریلی کے بعد ٹرمپ کے حامیوں نے کیپیٹل ہل پر حملہ کیا تھا۔
