اردو ورلڈ کینیڈا ( ویب نیوز ) ترک صدر رجب طیب اردوان نے یورپی کمیشن کو خبردار کیا ہے کہ اگر ضرورت پڑی تو ترکی یورپی یونین سے علیحدگی اختیار کر سکتا ہے۔

24 سال سے ترکی یورپی یونین کا رکن بننے کا خواہشمند تھا لیکن اب ترک صدر نے اس خواہش میں کمی کا عندیہ دے دیا ہے۔

غیر ملکی میڈیا کے مطابق ترک صدر کا یہ بیان ترکی کی رکنیت کے حوالے سے یورپی یونین کے رکن ممالک کے اعتراضات پر مبنی حالیہ رپورٹ کے اجراء کے بعد سامنے آیا ہے۔27 رکنی یورپی یونین میں ترکی کی رکنیت سے متعلق رپورٹ میں کہا گیا ہے کہ موجودہ صورتحال میں ترکی یونین کا رکن نہیں رہ سکتا تاہم دوستانہ تعلقات برقرار رکھنے کے لیے متوازی حقیقی فریم ورک کی کوشش کی جائے گی۔رپورٹ میں کہا گیا ہے کہ ترکی کی رکنیت کے حوالے سے رکن ممالک نے انسانی حقوق کی صورتحال اور وہاں کے قانون کے احترام پر تحفظات کا اظہار کیا ہے۔صدر اردواں نے کہا کہ اگر یورپی یونین ترکی کے ساتھ تعلقات منقطع کرنا چاہتی ہے تو ہم بھی ان حالات کا اپنے حساب سے جائزہ لیں گے اور اگر ضرورت پڑی تو ہم یورپی یونین سے اپنے راستے الگ کر لیں گے۔