اردو ورلڈ کینیڈا ( ویب نیوز )پاکستان تحریک انصاف کے چیئرمین عمران خان نے کہا ہے کہ 14 مئی کو انتخابات نہ ہوئے تو اگلے ہفتے سے سڑکوں پر ہوں گے
لاہور میں ریلی کے شرکاء سے خطاب کرتے ہوئے سابق وزیراعظم عمران خان نے کہا ہے کہ مجھے دو بار مارنے کی کوشش کی، ہم پر قاتلانہ حملوں کی کسی کو پرواہ نہیں، قوم ہار رہی ہے، انہیں کوئی پرواہ نہیں۔ ملک میں الیکشن کا وقت آگیا ہے، الیکشن کے ذریعے عوامی نمائندوں کو آگے آنے کا موقع دیا جائے۔
چیئرمین تحریک انصاف عمران خان نے کہا کہ جنرل باجوہ نے اس ملک کو مہنگائی اور تباہی کا تحفہ دیا ہے۔ جنرل باجوہ نے اس ملک کے ساتھ جو کیا وہ دشمن بھی نہ کرے۔ میں شہباز شریف سے پوچھتا ہوں کہ آپ برطانیہ میں کیا کر رہے ہیں؟ آج پاکستان کے حالات کیا ہیں
عمران خان نے کہا ہے کہ ہم قانون کی حکمرانی قائم کرنے کے لیے جہاد کر رہے ہیں، جب تک الیکشن نہیں ہوں گے ہم سانس نہیں لیں گے۔ امپورٹڈحکومت میں مہنگائی تین گنا بڑھ چکی ہے۔ صنعتیں بند ہو رہی ہیں، حکومت کی وجہ سے پاکستان دنیا میں رسوا ہو رہا ہے۔
انہوں نے کہا کہ بھارتی وزیر خارجہ کا رویہ ہم سب کے لیے باعث شرم ہے۔ روانگی سے قبل بلاول بھٹو نے کسی سے پوچھا کہ اس دورے کا کیا فائدہ یا نقصان ہوگا؟ میں ہندوستانی وزیر خارجہ سے یہ بھی پوچھتا ہوں کہ کیا آپ میں کوئی تہذیب ہے؟، مہمان کو اپنے ملک میں بلانا، اس طرح کا رویہ ہندوستان کو جچتا نہیں۔
