اردو ورلڈ کینیڈا ( ویب نیوز ) 2026 کے سرمائی اولمپکس میں اب صرف دو ماہ رہ گئے ہیں۔
لیکن برفانی ہاکی مقابلوں کے لیے تیار کیے جانے والے کھیل کے میدانوں کی تاخیر اور خامیوں نے امریکی نیشنل ہاکی لیگ کو شدید تشویش میں مبتلا کر دیا ہے۔ لیگ نے واضح کر دیا ہے کہ اگر اولمپک ہاکی کے میدان وقت پر مکمل نہ ہوئے یا ان کی برف کا معیار غیر محفوظ ہوا تو اس کے کھلاڑی مقابلوں میں حصہ نہیں لیں گے۔اٹلی میں کھیلے گئے ایک تجرباتی میچ کے دوران رُھو آئس ہاکی میدان کا استعمال کیا گیا، مگر اصل تشویش مرکزی میدان ’’سانتا جولیّا‘‘ کے بارے میں ہے۔ سولہ ہزار نشستوں پر مشتمل یہ اسٹیڈیم ابھی تک پوری طرح تیار نہیں ہو سکا۔ منتظمین کا دعویٰ ہے کہ میدان بروقت تیار ہو جائے گا، لیکن برف کے معیار اور اس کی مضبوطی کے بارے میں کوئی واضح یقین دہانی نہیں کرائی گئی۔
وِنی پَیگ میں ہونے والی پریس کانفرنس میں لیگ کے سربراہ گیری بیٹمین نے بتایا کہ مرکزی میدان میں اب تک ایک مرتبہ بھی برف نہیں جمائی گئی۔ ان کا کہنا تھا کہ جب تک برف کو عملی طور پر دیکھا اور کھلاڑیوں کے ذریعے آزمایا نہیں جاتا، یہ نہیں کہا جا سکتا کہ وہ کھیل کے لیے محفوظ ہوگی یا نہیں۔یہ سرمائی اولمپکس 2014 کے بعد پہلا موقع ہوں گے جب این ایچ ایل کے کھلاڑی شرکت کر رہے ہوں گے، اسی لیے لیگ اس معاملے میں غیر معمولی احتیاط برت رہی ہے۔ اسی مقصد کے تحت لیگ نے اپنے ماہرین کو اٹلی بھیجا ہے تاکہ برف کے معیار، گرمی کے دباؤ اور تماشائیوں کی تعداد کے اثرات کا جائزہ لیا جا سکے۔
لیگ کے نائب سربراہ بِل ڈیلی نے واضح طور پر کہا کہ اگر برف مکمل طور پر مضبوط اور محفوظ نہ ہوئی تو وہ اولمپکس میں نہیں جائیں گے۔ ان کے مطابق کھلاڑیوں کی سلامتی لیگ کی اولین ترجیح ہے۔برف کے معیار کے ساتھ ساتھ میدانوں کے پیمانے نے بھی نیا مسئلہ کھڑا کر دیا ہے۔ دونوں اولمپک میدانوں کی چوڑائی زیادہ اور لمبائی تین فٹ کم رکھی گئی ہے، جو این ایچ ایل اور عالمی ہاکی فیڈریشن کے طے کردہ معیار سے مختلف ہے۔ لیگ کے عہدیداروں نے میزبان انتظامیہ سے اس تبدیلی پر حیرت کا اظہار کیا ہے۔
تجرباتی میچ میں جاپان کے کپتان دائیگو ہوتّا نے بتایا کہ میچ کے وقت برف نسبتاً بہتر تھی، مگر ابتدائی مشق کے دوران نرم محسوس ہو رہی تھی۔ انہوں نے میدان کے پیمانے کو بھی غیر معمولی طور پر چھوٹا قرار دیا۔
ملانو کورٹینا انتظامیہ کا مؤقف ہے کہ میدانوں کے پیمانے عالمی ہاکی قوانین کے مطابق ہیں، اور اسی طرح کے میدان بیجنگ کے 2022 سرمائی اولمپکس میں بھی استعمال کیے گئے تھے۔اگرچہ این ایچ ایل میدانوں کے سائز کے مسئلے کو زیادہ اہم نہیں سمجھ رہا، لیکن اصل پریشانی یہ ہے کہ سرمائی اولمپکس کی تاریخ میں کبھی بھی ہاکی کے بڑے میدان اتنے قریب وقت میں اتنے نامکمل نہیں رہے۔اولمپکس کا پہلا خواتین ہاکی میچ پانچ فروری کو شیڈول ہے۔ وقت تیزی سے کم ہو رہا ہے اور دنیا بھر کی نگاہیں اب اس بات پر لگی ہوئی ہیں کہ آیا مرکزی میدان کھلاڑیوں کے لیے محفوظ اور قابلِ استعمال ثابت ہوگا یا نہیں۔
