اردو ورلڈ کینیڈا ( ویب نیوز ) نو منتخب امریکی صدر ڈونلڈ ٹرمپ نے دھمکی دی ہے کہ اگر اسرائیلی یرغمالیوں کو رہا نہ کیا گیا تو وہ مشرق وسطیٰ کو جہنم بنا دیں گے۔
ڈونلڈ ٹرمپ نے کہا کہ 20 جنوری کو میری حلف برداری سے قبل اگر اسرائیلی یرغمالیوں کو رہا نہیں کیا گیا تو وہ مشرق وسطیٰ کو جہنم بنا دیں گے۔سوشل میڈیا پلیٹ فارم ’ٹروتھ سوشل‘ پر اپنے بیان میں ٹرمپ نے کہا کہ جو لوگ انسانیت کے خلاف یہ مظالم کر رہے ہیں انہیں ان کے اعمال کی قیمت چکانی پڑے گی۔انہوں نے مزید کہا کہ ان کی حکومت ذمہ داروں کو ایسا سبق سکھائے گی جو امریکی تاریخ میں کبھی نہیں دیا گیا۔ ٹرمپ کی دھمکی کے بعد اسرائیل اور حماس کے درمیان جاری کشیدگی میں شدت آنے کا امکان ہے۔
اس سے قبل غزہ میں اسرائیلی یرغمالیوں کے حوالے سے حماس نے اپنے بیان میں کہا تھا کہ 14 ماہ سے جاری جنگ کے دوران 33 یرغمالی مارے جا چکے ہیں جب کہ بہت سے یرغمالی ابھی تک لاپتہ ہیں۔
حماس نے اسرائیل کو خبردار کیا کہ یرغمالیوں کے حوالے سے جو بھی اقدامات کرے وہ جلدکرے ورنہ بہت دیر ہو جائے گی۔اسرائیلی حکومت نے ابھی تک یرغمالیوں کی رہائی پر کوئی باضابطہ ردعمل ظاہر نہیں کیا ہے، لیکن اس صورتحال نے خطے میں مزید سیاسی تناؤ کو ہوا دی ہے، اور ٹرمپ کی دھمکی نے عالمی سطح پر اسرائیل اور حماس کے درمیان بات چیت کے لیے نئی راہیں کھول دی ہیں۔
