اردو ورلڈ کینیڈا ( ویب نیوز )وزیر اعلیٰ پنجاب چوہدری پرویز الٰہی نے کہا ہے کہ اجلاس جاری ہو تو گورنر راج لگ سکتا نہ ہی عدم اعتماد آسکتی ہے
پاکستان براڈ کاسٹرز ایسوسی ایشن کے اراکین سے بات کرتے ہوئے پرویز الہٰی نے پاکستان تحریک انصاف کے چیئرمین عمران خان کی کال پر پنجاب اسمبلی تحلیل کرنے کے مطالبے کا اعادہ کرتے ہوئے کہا کہ ہمیں ایوا ن میں 191 قانون سازوں کی حمایت حاصل ہے۔ انہوں نے مزید کہا کہ اسمبلی کے جاری اجلاس کے دوران گورنر راج کا کوئی امکان نہیں ہے۔
وزیراعلیٰ پنجاب نے مزید کہا کہ آئین اور قانون کے دائرہ کار میں رہ کر تمام اقدامات کریں گے، موجودہ حکمرانوں نے ملکی معیشت کو نقصان پہنچایا ہے۔
قبل ازیں ایک بیان میں الٰہی کا کہنا تھا کہ راولپنڈی کے عوامی اجتماع میں سابق وزیراعظم کے اعلان کے بعد عمران خان کی حکمت عملی فیصلہ کن دور میں داخل ہو گئی ہے ۔
وزیراعلیٰ پنجاب نے کہا کہ وہ عمران خان کی کال پر ایک منٹ میں پنجاب اسمبلی تحلیل کر دیں گے، پی ٹی آئی کے سربراہ کے حالیہ اعلان کے بعد پی ڈی ایم کا جعلی اتحاد ٹوٹ جائے گا۔
