اردوورلڈ کینیڈا( ویب نیوز)ائیرپورٹ سگنل کے قریب اتوار کی رات ہونے والے خودکش دھماکے کی تحقیقات میں پولیس نے خودکش حملہ آور شاہ فہد کو سہولت فراہم کرنے میں ملوث ایک خاتون سمیت دو افراد کو گرفتار کر لیا۔.
اس سلسلے میں پولیس ذرائع کا کہنا ہے کہ تفتیشی حکام نے خودکش حملہ آور کے قریبی رشتہ دار کو ملیر میں چھاپے کے دوران گرفتار کیا تھا جس کی شناخت پر خاتون کو بھی گرفتار کیا گیا تھا۔.
ذرائع کا کہنا ہے کہ حملہ آور شاہ فہد حملے سے قبل گرفتار شخص کے گھر میں ٹھہرے ہوئے تھے۔.
تفتیشی ذرائع کے مطابق خاتون خودکش دھماکے کی منصوبہ بندی میں بھی ملوث ہے، خاتون سمیت دو افراد کو سی سی ٹی وی فوٹیج کی مدد سے گرفتار کیا گیا۔.
ذرائع کے مطابق تفتیش کے دوران دہشت گرد کے بیک اپ پر ایک اور گاڑی کا بھی انکشاف ہوا ہے جبکہ بیک اپ پر موجود گاڑی سے لی گئی ویڈیو بھی تفتیشی ایجنسیوں کو ملی ہے جس میں حملہ آور کی گاڑی کو دیکھا جا سکتا ہے۔.
دھماکے میں استعمال ہونے والی کار کی ویڈیو حملے سے پہلے بنائی گئی تھی جبکہ مبینہ ساتھی نے سدر کے ہوٹل میں خودکش حملہ آور سے بھی ملاقات کی تھی۔.
34
