اردو ورلڈ کینیڈا ( ویب نیوز )پاکستان تحریک انصاف کے چیئرمین عمران خان نے اتوار کے روز وزیر اعظم شہباز شریف پر جوابی حملہ کیا جب انہوں نے مریدکے سے اسلام آباد کے لیے اپنا حقیقی آزادی مارچ دوبارہ شروع کیا، جو تیسرے دن میں داخل ہو چکا ہے۔
عمران خان نے مارچ کے شرکا سے خطاب کرتے ہوئے کہا کہ شہباز شریف آپ نے بیان دیا کہ میں نے آپ کو پیغام دیا کہ مل بیٹھ کر آرمی چیف کے بارے میں فیصلہ کریں، شہباز شریف میری بات سنیں میں بوٹ پالش کرنے والوں سے بات نہیں کرتا۔ ”
پی ٹی آئی کے سربراہ ایک روز قبل وزیر اعظم شہباز شریف کے اس بیان کا حوالہ دے رہے تھے، جس میں انہوں نے دعوی کیا تھا کہ انہوں نے آرمی چیف کی تقرری سے متعلق عمران کی تجویز کو مسترد کر دیا، اور اس کے بجائے انہیں میثاق جمہوریت اور چارٹر آف اکانومی پر مذاکرات کی پیشکش کی۔
شہباز کو جواب دیتے ہوئے عمران نے مزید سوال کیا کہ آپ سے بات کرنے کا کیا فائدہ؟ آپ سیکیا بات کرنی ہے؟
انہوں نے مزید کہا کہ جس طرح سے آپ کو اقتدار میں لایا گیا، پہلے تو آپ نے امریکیوں سے بھیک مانگی، پھر آپ نے گاڑی کی ڈکی میں چھپ کرجوتے پالش کیے۔
اسٹیبلشمنٹ کے ساتھ بیک چینل بات چیت کا اشارہ دیتے ہوئے عمران نے کہا: شہباز شریف نے کہا کہ میں نے پیغام بھیجا میں پیغام کیوں بھیجوں گا؟ میں نے ان لوگوں سے بات کی ہے جو آپ کو کٹھ پتلی کی طرح نچاتے ہیں اور میرا ایک ہی مطالبہ ہے کہ ملک میں صاف اور شفاف انتخابات ہوں۔
انہوں نے دعوی کیا کہ "میں نے لوگوں کو اپنا بیانیہ سمجھا دیا اور پھر ایک بڑی پارٹی بنائی اور آج یہ پاکستان کی سب سے بڑی جماعت ہے”۔
آزادانہ اور منصفانہ انتخابات کے لیے اپنی پارٹی کے مطالبے کو دہراتے ہوئے عمران نے کہا کہ "ہم صرف منصفانہ اور شفاف انتخابات چاہتے ہیں اور پاکستان کے عوام جو بھی فیصلہ کریں گے ہم اسے قبول کریں گے۔”
انہوں نے مزید کہا کہ وہ بھی ملک میں قانون کی حکمرانی چاہتے ہیں۔ "میں چاہتا ہوں کہ میرے لوگوں کے حقوق کا تحفظ کیا جائے۔ ہم انسان ہیں، ہم بھیڑ بکریاں نہیں ہیں۔
