اردوورلڈ کینیڈا( ویب نیوز)پاکستان تحریک انصاف کے چیئرمین عمران خان نےظل شاہ قتل کیس میں عبوری ضمانت کے لیے لاہور ہائی کورٹ میں درخواست دائر کردی۔
سابق وزیراعظم عمران خان نے اپنے وکیل بیرسٹر سلمان صفدر کے ذریعے درخواست دائر کی۔

سیکیورٹی خدشات کے پیش نظر عمران خان نے سیشن کورٹ کے بجائے ہائی کورٹ میں عبوری ضمانت کی درخواست دائر کر دی ہے۔
درخواست میں موقف اختیار کیا گیا ہے کہ تھانہ سرور روڈ نے بے بنیاد اور جھوٹا مقدمہ درج کیا ہے اور حکومت کی جانب سے سیاسی انتقام کا نشانہ بنایا جا رہا ہے۔
درخواست میں عمران خان نے استدعا کی ہے کہ لاہور ہائیکورٹ عبوری ضمانت منظور کرنے کا حکم دے۔
بعد ازاں سابق وزیراعظم عمران خان نے درخواست ضمانت پر حاضری کے لیے رجسٹرار آفس سے گاڑی ہائی کورٹ کے اندر لانے کی اجازت مانگ لی۔۔
عمران خان کی جانب سے کہا گیا ہے کہ انہیں کیس میں پیش ہونے کے لیے ہائی کورٹ میں پیش ہونا ہوگا، سیکیورٹی خدشات ہیں، گاڑی کو لاہور ہائی کورٹ میں داخل ہونے دیا جائے۔