اردوورلڈکینیڈا( ویب نیوز)گورنر سندھ کامران خان ٹیسوری نے کہا ہے کہ اڈیالہ جیل میں بیٹھا شخص غرور کا مظاہرہ کر رہا ہے اور میرا واضح مؤقف ہے کہ پاکستان تحریک انصاف سے مذاکرات کا سلسلہ ختم کر دینا چاہیے۔ ان کا کہنا تھا کہ جن عناصر نے ملک کی ترقی میں رکاوٹیں ڈالیں، ان سے بات چیت کا کوئی جواز نہیں بنتا۔
مزارِ قائد پر حاضری کے بعد میڈیا سے گفتگو کرتے ہوئے گورنر سندھ نے کہا کہ پی ٹی آئی کے اپنے قریبی ساتھی بھی مذاکرات پر آمادہ نہیں، اس لیے ایسی جماعت سے بات کرنے کا کوئی فائدہ نہیں جو قومی مفاد کے خلاف کھڑی ہو۔ انہوں نے کہا کہ قائداعظم محمد علی جناح کا یومِ پیدائش ہمیں قربانی، جدوجہد اور نئے عزم کی یاد دلاتا ہے۔ قائداعظم نے اپنی مدبرانہ قیادت اور اصولی سیاست سے پاکستان حاصل کیا، اور اگر آج کی سیاسی قیادت اور نوجوان ان کے بتائے ہوئے اصولوں پر عمل کریں تو ملک ترقی کی راہ پر گامزن ہو سکتا ہے۔
کامران ٹیسوری نے دعویٰ کیا کہ سال 2025 پاکستان کی تاریخ میں ایک اہم اور یادگار سال کے طور پر لکھا جائے گا۔ ان کا کہنا تھا کہ پاکستان کو عالمی سطح پر ایک فاتح قوم کے طور پر تسلیم کیا جا رہا ہے، کیونکہ اس نے اپنے سے کئی گنا طاقتور دشمن کا مقابلہ کامیابی سے کیا۔ اب پاکستان معیشت کے میدان میں بھی بھرپور تیاری کے ساتھ آگے بڑھ رہا ہے اور اس محاذ پر بھی کامیابی حاصل کرے گا۔
گورنر سندھ نے کہا کہ پاکستان اس وقت دنیا کی توجہ کا مرکز بن چکا ہے اور بین الاقوامی جریدے پاکستان کو کامیاب جبکہ بھارت کو ناکام قرار دے رہے ہیں۔ ان کے مطابق فیلڈ مارشل کی واضح اور مضبوط پالیسیوں نے پاکستان کو عالمی سطح پر نمایاں مقام دلایا اور انہیں دنیا بھر میں غیر معمولی پروٹوکول دیا جا رہا ہے۔
انہوں نے مزید کہا کہ بہترین عسکری حکمت عملی کے باعث پاکستان کا اعتماد بحال ہوا ہے اور اب سی پیک کے دوسرے مرحلے کا آغاز ہو چکا ہے۔ پاکستان معاشی ترقی کے لیے اہم فیصلے کر رہا ہے اور دوست ممالک کے ساتھ مل کر نئے معاہدے طے پا رہے ہیں۔ ان کا کہنا تھا کہ پاکستان حرمین شریفین کے محافظ کے طور پر بھی ایک اہم کردار ادا کر رہا ہے۔
کامران ٹیسوری نے کہا کہ دو دہائیوں بعد نجکاری کا عمل شفاف انداز میں نظر آ رہا ہے اور پی آئی اے کی نجکاری ملک کی معیشت کے لیے گیم چینجر ثابت ہو سکتی ہے۔ انہوں نے کہا کہ دنیا پاکستان کی عسکری صلاحیت اور معاشی پیش رفت کو تسلیم کر رہی ہے اور اللہ کے فضل سے پاکستان خطے میں ایک مضبوط اور مؤثر طاقت بن چکا ہے۔
افغانستان سے متعلق بات کرتے ہوئے گورنر سندھ نے کہا کہ پاکستان نے انتہا پسندی کے معاملے پر واضح اور دوٹوک پالیسی اپنائی ہے اور دنیا کو یہ پیغام دیا ہے کہ دہشت گردی کے خلاف کوئی سمجھوتہ نہیں ہوگا۔
ایک سوال کے جواب میں انہوں نے بتایا کہ وفاقی حکومت نے خالد مقبول صدیقی اور ایم کیو ایم کو 20 ارب روپے کا ترقیاتی پیکج دیا ہے، اور طے پایا ہے کہ وہ خود ان منصوبوں کی تکمیل میں فعال کردار ادا کریں گے۔
