اردو ورلڈ رکینیڈا ( ویب نیوز )نکاح خواں مفتی سعید نے چیئرمین پی ٹی آئی عمران خان اور ان کی اہلیہ بشری بی بی کے خلاف غیر قانونی نکاح کیس میں اپنا بیان ریکارڈ کرا دیا۔
مفتی سعید اسلام آباد کی عدالت میں اپنا بیان ریکارڈ کرانے کے لیے اپنے وکیل راجہ رضوان عباسی کے ساتھ کمرہ عدالت پہنچے جہاں انھوں نے اپنے بیان میں کہا کہ عمران خان نے یکم جنوری 2018 کو مجھ سے ایک کال پر رابطہ کیا، عمران خان کے ساتھ اچھے تعلقات تھے۔ عمران خان نے مجھے بشری بی بی کے ساتھ نکاح کرنے کا کہا، عمران خان نے کہا کہ مجھے نکاح کے لیے لاہور جانا ہے۔
مفتی سعید کے مطابق بشری بی بی کے ساتھ ایک خاتون نے خود کو بشری بی بی کی بہن ظاہر کیا۔ اس پر خاتون نے کہا کہ بشری بی بی کی شادی کی تمام شرعی شرائط پوری ہیں، خاتون نے کہا کہ عمران خان اور بشری بی بی کا نکاح ہوسکتا ہے۔
مفتی سعید نے اپنے بیان میں مزید کہا کہ یکم جنوری 2018 کو عمران خان اور بشری بی بی کا نکاح خاتون کی یقین دہانی پر کیا، پھر فروری 2018 کو عمران خان نے مجھ سے دوبارہ رابطہ کیا اور بشری بی بی سے دوبارہ نکا ح کرنے کی درخواست کی۔
مفتی سعید کے مطابق عمران خان نے کہا کہ پہلی شادی کے وقت بشری بی بی کی عدت پوری نہیں ہوئی تھی۔ عمران خان نے کہا کہ بشری بی بی کو نومبر 2017 میں طلاق ہو گئی، عمران خان نے کہا کہ پہلی شادی غیر قانونی تھی۔
