اردوورلڈ کینیڈا( ویب نیوز)بانی پی ٹی آئی عمران خان کا کہنا ہے کہ پرسوں کے ایجنڈے کے تحت بیانیہ بنایا گیا کہ میں نے لوگوں کو جی ایچ کیو کے خلاف احتجاج پر اکسایا۔
سماجی رابطے کی ویب سائٹ ایکس (ٹوئٹر) پر جاری بیان میں عمران خان نے کہا کہ پرسوں میڈیا پر ایک مخصوص ایجنڈے کے تحت بیانیہ بنایا گیا کہ میں نے جی ایچ کیو جا کر لوگوں کو احتجاج پر اکسایا، جب کہ حقیقت یہ ہے کہ تحریک انصاف کے تقریباً 3 دہائیوں پر محیط تاریخ میں پرتشدد احتجاج کی کوئی مثال نہیں ملتی۔ گزشتہ ڈھائی سال کے دوران تحریک انصاف کے خلاف بدترین حربے استعمال کیے گئے نومبر 2022 میں مجھ پر قاتلانہ حملہ ہوا اور میری پسند کی ایف آئی آر بھی مسترد کر دی گئی۔
ان کا مزید کہنا تھا کہ اس کے بعد دو بار میری رہائش گاہ پر ملٹری اسٹیبلشمنٹ نے حملہ کیا۔ ایک دفعہ میری پیشی کے موقع پر سادہ کپڑوں میں ملبوس لوگوں نے مجھے قتل کرنے کا باقاعدہ منصوبہ بنا کر چھوڑ دیا۔ یہی نہیں بلکہ 9 مئی کو ایک سابق وزیر اعظم اور پاکستان کی سب سے بڑی اور مقبول سیاسی جماعت کے سربراہ کو جس گھناؤنے انداز میں اغوا کیا گیا وہ کسی بڑے حادثے کا سبب بن سکتا تھا لیکن تحریک کی سیاسی تربیت میں تشدد کا کوئی عنصر نہیں ہے۔
عمران خان نے مزید کہا کہ 9 مئی فالس فلیگ آپریشن تھا۔ جس نے بھی 9 مئی کی سی سی ٹی وی فوٹیج چرائی وہ 9 مئی کا اصل مجرم ہے۔