اردو ورلڈ کینیڈا ( ویب نیوز )پاکستان تحریک انصاف (پی ٹی آئی) کے رہنما اور سابق وفاقی وزیر علی امین گنڈا پور کا جیل سے رہائی کے بعد چیئرمین پی ٹی آئی عمران خان کی رہائش گاہ زمان پارک پہنچنے پر ان کا شاندار استقبال کیا گیا۔
تفصیلات کے مطابق پی ٹی آئی رہنما علی امین گنڈا پور کو جمعرات کو سندھ کے ضلع سکھر کی جیل سے رہا کردیا گیا جس کے بعد وہ پارٹی سربراہ عمران خان سے ملاقات کے لیے قافلے میں لاہور روانہ ہوگئے اور رات گئے وہ سابق وزیراعظم کی رہائش گاہ زمان پارک پہنچے۔
پاکستان تحریک انصاف کے رہنما علی امین گنڈا پور کا جیل سے رہائی کے بعد زمان پارک پہنچنے پر پرتپاک استقبال، سابق وزیر اعظم عمران خان بھی پھولوں کی پتیاں نچھاور کرتے رہے۔۔۔۔۔۔#AliAminGandapur #PTI #ImranKhan pic.twitter.com/CiZUeDTcVZ
— Malik Hassan (@mlikhasan) May 5, 2023
علی امین گنڈا پور کے زمان پارک پہنچنے پر وہاں موجود پی ٹی آئی کارکنوں نے ان کا پرتپاک استقبال کیا۔
حال ہی میں سماجی رابطے کی ویب سائٹ ٹوئٹر پر ایک دلچسپ ویڈیو منظر عام پر آئی ہے جس میں علی امین گنڈا پور کو عمران خان کے پہلو میں بیٹھے ہوئے پارٹی کارکنوں سے ملاقات کے دوران انہیں پھولوں کے ہار پہنائے ہوئے دیکھا جاسکتا ہے۔
ویڈیو میں عمران خان کو اس موقع پر مسکراتے ہوئے علی امین گنڈا پور پر پھولوں کی پتیاں نچھاور کرتے بھی دیکھا جا سکتا ہے۔
واضح رہے کہ علی امین گنڈا پور کا شمار پاکستان تحریک انصاف کے اہم رہنماؤں میں ہوتا ہے اور وہ 2018 کے عام انتخابات میں جمعیت علمائے اسلام (ف) کے سربراہ مولانا فضل الرحمان کو شکست دے کر رکن قومی اسمبلی بنے تھے۔
یاد رہے کہ عمران خان کی رہائش گاہ زمان پارک میں آپریشن اور اسلام آباد کے جوڈیشل کمپلیکس میں ان کی حاضری کے بعد علی امین گنڈا پور کو ملک کے مختلف شہروں میں مختلف مقدمات کا سامنا کرنا پڑا تھا۔
عمران خان اور تحریک انصاف کے رہنماؤں نے بھی علی امین گنڈا پور کے خلاف مقدمات کے قیام کی مذمت کی اور مقدمات کو حکومت کی گھناؤنی چال قرار دیا۔
