اردو ورلڈ کینیڈا ( ویب نیوز )وفاقی وزیر عبدالقادر پٹیل نے انکشاف کیا ہے کہ تحریک انصاف کے چیئرمین عمران خان کی میڈیکل رپورٹ کے مطابق ان کا دماغی توازن درست نہیں اور وہ شراب اور کوکین کا استعمال کرتے ہیں۔

وفاقی وزیر صحت نے پریس کانفرنس کرتے ہوئے کہا ہے کہ عمران خان پر حملے کے بعد ہسپتال پہنچنے سے پہلے ان کا میڈیکل کرایا گیا، میڈیکل رپورٹ پبلک پراپرٹی ہے جو عوام کے سامنے پیش کر رہا ہوں۔

انہوں نے انکشاف کیا کہ میڈیکل رپورٹ کے مطابق عمران خان شراب اور کوکین کا استعمال کرتے ہیں اور ان کا دماغی توازن ٹھیک نہیں ہے۔

وفاقی وزیر صحت کا کہنا تھا کہ حملے کے بعد عمران خان کی ٹانگ پر گولیوں کے ٹکڑے لگے اور اسے فریکچر کہہ کر پلستر کیا، تاہم میڈیکل رپورٹس میں ان کی ٹانگ میں فریکچر کا کوئی ذکر نہیں ہے۔

عبدالقادر پٹیل نے کہا کہ جن ڈاکٹروں نے عمران خان کو پانچ سے چھ ماہ تک پلاسٹر پہننے کا مشورہ دیا تھا انہیں بھی بلایا جائے گا۔

ایک سوال کے جواب میں وفاقی وزیر صحت نے کہا کہ اگر سپریم کورٹ عمران خان کو پاگل قرار دے تو ہم عدالتی فیصلہ تسلیم کریں گے۔

9 مئی کے واقعات کا ذکر کرتے ہوئے انہوں نے کہا کہ 9 مئی کو کیا ہوا سب جانتے ہیں، عمران خان نے ریڈ لائن کراس کی، ہمیں بھی کوڑے لگے، ہم نے جیلیں بھی دیکھیں، لیکن ہم فوج کے ساتھ کھڑے رہے۔