اردو ورلڈ کینیڈا ( ویب نیوز )سابق وزیراعظم اور پاکستان تحریک انصاف (پی ٹی آئی) کے چیئرمین عمران خان کو آئندہ 4 سے 5 روز تک قومی احتساب بیورو (نیب) کی تحویل میں رکھے جانے کا امکان ہے۔
رپورٹ کے مطابق نیب ذرائع کا کہنا ہے کہ عمران خان کو آج احتساب عدالت میں پیش کیا جائے گا۔
ذرائع کا کہنا ہے کہ عمران خان کو کم از کم 4 سے 5 دن تک حراست میں رکھنے کی پوری کوشش کی جائے گی
واضح رہے کہ قومی احتساب آرڈیننس 1999 میں نئی ترامیم کے تحت کسی بھی عدالت کی جانب سے جسمانی ریمانڈ کی مدت 90 دن سے کم کر کے 14 دن کر دی گئی ہے۔
نیب ذرائع کا کہنا ہے کہ ہم عدالت سے زیادہ سے زیادہ 14 دن کا جسمانی ریمانڈ مانگیں گے، توقع ہے کہ کم از کم 4 سے 5 دن کا ریمانڈ حاصل کیا جائے گا۔
انہوں نے کہا کہ عمران خان کو نیب کے راولپنڈی/اسلام آباد ریجنل ہیڈ کوارٹرز میں مکمل طور پر آرام دہ ماحول میں حراست میں لیا گیا ہے۔
انہوں نے کہا کہ عمران خان کے ساتھ سختی سے نہیں نمٹا جائے گا بلکہ ان سے صرف اس کیس میں مبینہ طور پر ملوث ہونے اور مالی فوائد حاصل کرنے کے حوالے سے پوچھ گچھ کی جائے گی۔
ایک سرکاری بیان کے مطابق نیب نے عمران خان کے خلاف کیس کی تفصیلات بھی فراہم کر دی ہیں۔
نیب نے رینجرز کی مدد سے اسلام آباد ہائی کورٹ کے احاطے سے عمران خان کی گرفتاری کو درست، قانونی اور خالصتاً نیب قوانین کے مطابق قرار دیا ہے۔
نیب کا اصرار ہے کہ عمران خان کی گرفتاری نیب کی جانب سے کی گئی انکوائری اور تفتیش کے قانونی تقاضے پورے کرنے کے بعد کی گئی ہے۔
ادھر نیب کی جانب سے القادر ٹرسٹ کیس میں دیگر مبینہ کرداروں کی گرفتاری کی تیاریاں جاری ہیں، عمران خان کے سابق مشیر احتساب شہزاد اکبر کی گرفتاری کے لیے انٹرپول کے ذریعے ریڈ وارنٹ جاری کرنے کا عمل بھی مکمل کر لیا گیا ہے۔
