اردو ورلڈ کینیڈا ( ویب نیوز)پاکستان تحریک انصاف کے چیئرمین اور سابق وزیراعظم عمران خان آج اسلام آباد ہائی کورٹ میں پیش ہوں گے۔
اسلام آباد ہائی کورٹ میں چیئرمین پی ٹی آئی کی 9 مقدمات میں ضمانت کی درخواستوں کی سماعت آج ہوگی۔
منگل کو لاہور ہائی کورٹ میں دھکے لگنے سے عمران خان کی ٹانگ بری طرح متاثر ہوئی تھی اور شدید درد کے باعث ڈاکٹروں نے انہیں آرام کا مشورہ دیا تھا جس کے باعث وہ گزشتہ روز اسلام آباد ہائی کورٹ میں پیش نہ ہو سکے۔

 عمران خان عدالتی اوقات میں پیش نہ ہوئے تو عبوری ضمانت منسوخ کر دی جائے گی،اسلام آباد ہائیکورٹ 

ہائی کورٹ نے ایک دن کی مہلت دیتے ہوئے حاضری یقینی بنانے کا کہا تھا جس کے بعد سابق وزیراعظم نے عدالت کے احترام اور قانون کی بالادستی کے لیے بہت تکلیف اٹھانے کے باوجود اسلام آباد ہائی کورٹ میں پیش ہونے کا فیصلہ کیا۔
عمران خان کے چیف آف سٹاف سینیٹر شبلی فراز نے گزشتہ روز پیشی کی تصدیق کرتے ہوئے کہا کہ عمران خان نے ہمیشہ عدالتوں کا احترام کیا ہے، وہ عدالت کے احترام میں اسلام آباد ہائی کورٹ میں پیش ہوں گے، وہ آئین اور عدالتوں کو اولیت دیں گے۔
شبلی فراز کا مزید کہنا تھا کہ ڈاکٹرز کے مشورے کے باوجود عمران خان عدالت میں پیش ہوں گے۔ لاہور ہائیکورٹ میں پیشی کے دوران عمران خان کے پاؤں پر چوٹ لگنے سے زخم آئے، ان کے پاؤں میں شدید سوجن اور درد ہے۔
دوسری جانب سابق وزیراعظم کی ہائیکورٹ میں پیشی کے موقع پر وفاقی دارالحکومت میں دفعہ 144 نافذ کردی گئی ہے۔
اسلام آباد کیپیٹل پولیس کے ترجمان کے مطابق عمران خان کی اسلام آباد ہائی کورٹ میں پیشی کے موقع پر دفعہ 144 نافذ ہے اور امن عامہ کے پیش نظر جی ٹین پروجیکٹ موڑ اور عون میں کسی بھی قسم کا اجتماع غیر قانونی ہوگا۔
ترجمان کے مطابق شہری سفر کے دوران متبادل راستوں کا انتخاب کریں ۔