اردو ورلڈ کینیڈا ( ویب نیوز ) عمران خان کی اسلام آباد آمد .چیئرمین پاکستان تحریک انصاف عمران خان 4 مختلف مقدمات میں پیشی کے لیے اسلام آباد پہنچ گئے۔عمران خان مقدمات میں پیشی کے لیے جوڈیشل کمپلیکس پہنچ گئے جہاں وہ عدالتوں میں پیش ہوں گے۔
اس موقع پر شدید بدنظمی دیکھنے میں آئی، پی ٹی آئی کارکنان جوڈیشل کمپلیکس کا دروازہ توڑ کر بڑی تعداد میں جوڈیشل کمپلیکس میں داخل ہوئے، جی 11 جوڈیشل کمپلیکس میں سکیورٹی کے انتظامات درہم برہم ہوگئے، پی ٹی آئی کارکنوں نے تمام رکاوٹیں توڑ دیں۔
چیئرمین پی ٹی آئی لاہور میں اپنی رہائش گاہ زمان پارک سے بذریعہ سڑک اسلام آباد پہنچے، اس سے قبل عمران خان نے جہاز سے آنے کا پروگرام بنایا تھا تاہم بعد میں روانگی کا پروگرام تبدیل کرکے موٹروے سے جانے کا فیصلہ کیا گیا تھا
عمران خان نے متعدد بار طلبی اور استثنی مانگنے کے بعد عدالت کے حکم پر آج پیش ہونے کا فیصلہ کیا۔
چیئرمین پی ٹی آئی اسلام آباد میں انسداد دہشت گردی کی عدالت اور بینکنگ کورٹ سمیت 4 مختلف مقدمات میں سیشن عدالت کے 2 مقدمات میں پیش ہو رہے ہیں۔
عمران خان کی آمد کے موقع پر سکیورٹی کے سخت انتظامات کیے گئے تھے۔
