اردو ورلڈ کینیڈا ( ویب نیوز )تحریک انصاف پنجاب کے ارکان نے پارٹی قیادت کو صوبائی اسمبلیاں فوری تحلیل نہ کرنے کا مشورہ دیا۔
ذرائع کے مطابق پنجاب سے تعلق رکھنے والے بعض ارکان نے اسمبلیاں فوری تحلیل نہ کرنے کا مشورہ دیتے ہوئے کہا کہ سیاسی کارڈ کھیلتے ہوئے ٹائمنگ کو مدنظر رکھا جائے
پی ٹی آئی ارکان نے فوری طور پر اسمبلیاں تحلیل نہ کرنے کا جواز پیش کرتے ہوئے کہا ہے کہ اس وقت حلقوں میں ترقیاتی کاموں کے لیے اربوں روپے کے ٹینڈرز لگ چکے ہیں جبکہ کئی سرکاری منصوبے تکمیل کے آخری مراحل میں ہیں۔
ادھر تحریک انصاف کی اعلی سطحی کمیٹی نے اسمبلیاں تحلیل کرنے کے معاملے پر اپنی سفارشات تیار کرلی ہیں۔ ذرائع کا کہنا ہے کہ کمیٹی ارکان نے 20 دسمبر تک اسمبلیاں تحلیل کرنے کی سفارش کی ہے، اس سے قبل پارٹی کے وائس چیئرمین شاہ محمود قریشی کی زیر صدارت کمیٹی کے اجلاس میں سیاسی صورتحال کا جائزہ لیا گیا۔
اجلاس میں میاں اسلم اقبال، محمود الرشید، حماد اظہر، اعجاز چوہدری اور دیگر اراکین نے شرکت کی۔ ذرائع کے مطابق عمران خان اعلی سطحی کمیٹی کی سفارشات پر پارلیمانی بورڈز کے اجلاس کے بعد تاریخ کا حتمی فیصلہ کریں گے۔
