اردوورلڈ کینیڈا( ویب نیوز)انسداد دہشت گردی عدالت لاہور نے پاکستان تحریک انصاف کے بانی کے پولی گرافک اور فوٹو گرافی ٹیسٹ کے حوالے سے استغاثہ کی درخواست پر تین صفحات پر مشتمل تحریری فیصلہ جاری کر دیا ہے۔
غدالت نے فیصلہ دیا کہ پی ٹی آئی کے بانی کو اپنی بے گناہی ثابت کرنے کے مکمل اور منصفانہ مواقع فراہم کیے گئے لیکن ان کی ضد اور مسلسل انکار کی وجہ سے کوئی نتیجہ نہیں نکل سکا۔
عدالت نے اپنے فیصلے میں لکھا کہ ایک عام ملزم کو اس طرح کے ٹیسٹ سے انکار کرنے کا موقع نہیں دیا جاتا جبکہ موجودہ ملزم (پی ٹی آئی کے بانی) نے نہ صرف ٹیسٹ کرانے سے انکار کیا بلکہ تحقیقاتی ٹیم سے ملنے سے بھی گریز کیا۔
عدالت نے حیرت کا اظہار کیا کہ ایسی صورتحال میں تحقیقات کیسے مکمل کی جا سکتی ہیں؟فیصلے میں کہا گیا کہ عدالت کو لگتا ہے کہ پی ٹی آئی کے بانی ان ٹیسٹوں سے انکار کر کے مقدمے سے بچنے کی کوشش کر رہے ہیں۔
عدالت نے پی ٹی آئی کے بانی کو ٹیسٹ کروانے کے دو مواقع دیے تھے لیکن انہوں نے دونوں بار انکار کر دیا۔. اس بنیاد پر عدالت نے واضح کیا ہے کہ انہیں اب تیسرا موقع نہیں دیا جائے گا کیونکہ عدالت کو اس سلسلے میں کسی مثبت نتائج کی توقع نہیں ہے۔
جج منظور علی گل نے فیصلے میں مزید کہا کہ اگرچہ ملزم کا وکیل اس بات سے اتفاق کرتا ہے کہ عدالت کسی کو ٹیسٹ کروانے پر مجبور نہیں کر سکتی لیکن ملزم کا مسلسل انکار تفتیشی عمل میں رکاوٹ ہے۔. عدالت نے ہدایت کی کہ تفتیشی افسران تکنیکی بنیادوں پر اس معاملے میں تفتیش مکمل کریں۔
