اردو ورلڈ کینیڈا ( ویب نیوز )بلوچستان کے مختلف علاقوں میں حالیہ مون سون بارشوں اور سیلاب سے ہلاکتوں کی تعداد 259 ہو گئی، جمعہ کو مزید 2 افراد جاں بحق ہو گئے۔
پراونشل ڈیزاسٹر مینجمنٹ اتھارٹی (پی ڈی ایم اے) کے مطابق بلوچستان کے مختلف علاقوں میں حالیہ مون سون بارشوں اور سیلاب سے ہلاکتوں کی تعداد 259 ہو گئی ہے، جن میں 125 مرد، 59 خواتین اور 75 بچے شامل ہیں، جب کہ 164 افراد زخمی ہوئے ہیں۔
رپورٹ میں بتایا گیا کہ سیلاب اور بارش سے متعلقہ واقعات میں ہلاکتیں کوئٹہ، بولان، کیچ، ژوب، دکی، خضدار، کوہلو، مستونگ، ہرنائی، قلعہ سیف اللہ، سبی اور صوبے کے دیگر اضلاع سے رپورٹ ہوئیں۔
پی ڈی ایم اے نے بتایا کہ شدید بارشوں سے کم از کم 500,000 مویشیوں کا نقصان ہوا۔ پی ڈی ایم اے نے بتایا کہ صوبے میں بارشوں اور سیلاب سے 63,068 مکانات کو نقصان پہنچا جن میں سے 17,108 مکانات مکمل طور پر تباہ جبکہ 44,960 مکانات کو جزوی نقصان پہنچا۔
پی ڈی ایم اے نے بتایا کہ سیلاب کی وجہ سے 1500 کلومیٹر سے زائد لمبی سڑکیں اور 18 پلوں کو نقصان پہنچا جبکہ دو لاکھ ایکڑ سے زائد رقبے پر کھڑی فصلیں بھی تباہ ہوگئیں۔ پی ڈی ایم اے متاثرہ اضلاع میں امدادی کارروائیاں کر رہی ہے۔
پی ڈی ایم اے کے مطابق گزشتہ 24 گھنٹوں کے دوران کوئٹہ، جعفرآباد، مستونگ، حب اور دکی کے متاثرہ اضلاع میں کم از کم 1800 فوڈ پیکٹ، 700 کمبل، 600 ترپال اور 100 واٹر کولر متاثرین میں تقسیم کیے گئے۔
