اردو ورلڈ کینیڈا ( ویب نیوز ) امریکا نے ایران کو دھمکی دی ہے کہ اسرائیل اور امریکی حکام پر مزید حملوں کی صورت میں سنگین نتائج برآمد ہوں گے۔اقوام متحدہ کی سلامتی کونسل میں خطاب کرتے ہوئے امریکی مندوب نے کہا ہے کہ اگر ایران نے اسرائیل اور امریکی حکام پر مزید حملہ کیا تو اسے سنگین نتائج کا سامنا کرنا پڑے گا۔امریکی مندوب لنڈا تھامس گرین فیلڈ نے کہا کہ ہم اپنے دفاع میں کسی بھی اقدام سے دریغ نہیں کریں گے، کوئی ابہام نہیں ہونا چاہیے۔

لنڈا تھامس نے کہا کہ امریکا مزید کشیدگی نہیں دیکھنا چاہتا، ایران اور اسرائیل کے درمیان براہ راست حملے ختم ہونے چاہئیں۔اس موقع پر ایرانی مندوب نے کہا کہ ایران اسرائیلی حملے کا اپنے منتخب وقت پر جواب دینے کا حق رکھتا ہے، امریکی حکومت اسرائیلی جارحیت میں شریک ہے اور اس کے نتائج بھگتیں گے۔