اردوورلڈ کینیڈا ( ویب نیوز)عمران خان کی گرفتاری کے بعد ملک کے بیشتر شہروں میں تعلیمی ادارے اور انٹرنیٹ سروس تیسرے روز بھی بند ہے جس کے باعث شہریوں کو شدید مشکلات کا سامنا ہے۔
لاہور میں پی ٹی آئی کارکنوں کی جانب سے زمان پارک جانے والی سڑک کو عام ٹریفک کے لیے بند کر دیا گیا ہے، لاٹھی بردار فورس موقع پر موجود ہے، سڑک بند ہونے سے شہریوں کو شدید پریشانی کا سامنا ہے۔
مال روڈ سے دھرم پورہ انڈر پاس تک کنال روڈ ایک طرف سے مکمل بلاک ہے، سڑک بند ہونے سے ٹریفک کی روانی شدید متاثر ہوئی ہے۔
دوسری جانب فیصل آباد میں تحریک انصاف کی پرتشدد کارروائیوں کا سلسلہ جاری ہے، شہر کے مختلف علاقے گزشتہ رات میدان جنگ بنے رہنے کے بعد معمولات زندگی بحال ہوگئے۔
پرتشدد کارروائیوں پر کارکنوں کے خلاف 5 مقدمات درج، 100 سے زائد کارکنوں کو گرفتار کر لیا گیا، اہم مقامات پر رینجرز اہلکار تعینات کر دئیے گئے۔
دوسری جانب ملک بھر میں انٹرنیٹ سروس مسلسل تیسرے روز بھی بند ہے جس کے باعث شہریوں کو شدید پریشانی کا سامنا ہے، دفتری امور بھی ٹھپ ہو کر رہ گئے ہیں۔
