اردوورلڈ کینیڈا ( ویب نیوز)راولپنڈی کے رہائشی 42 سالہ محمد مسعود نے بچوں کی فیس اور گھر کا کرایہ ادا کرنے کے لیے 13 ہزار روپےآن لائن ایپ سے قرض لیا تھا جو سود کے ساتھ ادا نہ کر پانے پر اس نے دوسری ایپ سے دوبارہ قرض لیا۔ قرض خواہوں کی دھمکیوں سے تنگ آکر 2 بچوں کے باپ نے پنکھے سے لٹک کر خودکشی کر لی۔

آن لائن لون ایپس

آن لائن ایپ سے قرض لے کر خودکشی کرنے والے محمد مسعود کی اہلیہ کا کہنا تھا کہ اس کے شوہر کی 6 ماہ قبل نوکری چلی گئی، بچوں کی فیس اور گھر کا کرایہ ادا کرنے کے لیے سوشل میڈیا ایزی لون  ایپ سے 13000 روپے ادھار لیے، جو کچھ دنوں کے بعد سود کے ساتھ ایک لاکھ روپے تک پہنچ گئے۔

مقتول محمد مسعود کی اہلیہ کا مزید کہنا تھا کہ شوہر نے قرض کی ادائیگی کے لیے ایک اور ایپ سے مزید قرضہ لیا جو چند ہفتوں کے بعد 20 لاکھ روپے تک پہنچ گیا۔ وہ  دھمکیاں دیتے تھے جس پر شوہر نے خودکشی کرلی۔

محمد مسعود کے دو بچے ہیں جو اپنے والد کی جدائی کے بعد بے گھر ہو گئے ہیں۔ مسعود کے بھائی نے بتایا کہ اس نے ریس کورس تھانے میں خودکشی کی رپورٹ درج کرائی ہے۔ .

مقتول کی اہلیہ نے سوشل میڈیا ایپس کے ذریعے مجبور لوگوں کو فوری قرضے دینے والی ایپس کے خلاف کارروائی کا مطالبہ کیا ہے، مسعود کے اہل خانہ قرض ایپ مالکان کے خلاف پولیس کو درخواست دے رہے ہیں۔