اردوورلڈ کینیڈا(ویب نیوز ) مینز ایمرجنگ ایشیا کپ کے فائنل میں پاکستان نے بھارت کو 128 رنز سے شکست دے دی۔
پاکستان کے 353 رنز کے تعاقب میں بھارتی ٹیم 40 اوورز میں 224 رنز پر ڈھیر ہو گئی۔ پاکستان کی جانب سے سفیان مقیم نے 3، مہران ممتاز، ارشد اقبال اور محمد وسیم نے 2، 2 اور مبشر خان نے ایک وکٹ حاصل کی۔
بھارتی بلے باز پاکستانی باؤلرز کے سامنے بے بس نظر آئے اور ایک کے بعد ایک کھلاڑی آؤٹ ہو کر پویلین لوٹتے گئے۔ ابھیشیک شرما نے 61، یش دھول نے 39 اور سائی سدھرسن نے 29 رنز بنائے۔
کولمبو کرکٹ اسٹیڈیم میں کھیلے گئے میچ میں بھارتی اے ٹیم کے کپتان یش دل نے ٹاس جیت کر پاکستان کو بیٹنگ کی دعوت دی۔
پاکستان کی جانب سے اوپنر صائم ایوب اور صاحبزادہ فرحان نے 121 کا شاندار آغاز فراہم کیا تاہم صائم ایوب 59 رنز بنا کر رن آؤٹ ہوئے جب کہ صاحبزادہ فرحان 65 رنز بنا کر رن آؤٹ ہوئے۔
دیگر کھلاڑیوں میں عمر بن یوسف 35، کپتان محمد حارث 2 جبکہ قاسم اکرم بغیر کوئی رن بنائے وکٹ گنوا بیٹھے، مڈل آرڈر میں طیب طاہر نے جارحانہ کھیل پیش کیا اور 71 گیندوں پر 12 چوکوں اور 4 چھکوں کی مدد سے 108 رنز کی اننگز کھیلی۔ دونوں کھلاڑیوں کے درمیان 125 رنز کی شراکت بھی قائم ہوئی۔
بھارت کی جانب سے ویان پراگ اور ہنگریکر نے 2، 2 جبکہ مانو سترا، ہرشت رانا اور نشانت سندھو نے ایک ایک وکٹ حاصل کی۔
اس سے قبل پاکستان نے پہلے سیمی فائنل میں سری لنکا کو 60 رنز سے شکست دی تھی جبکہ دوسرے سیمی فائنل میں بھارت نے بنگلہ دیش کو 51 رنز سے شکست دے کر فائنل کے لیے کوالیفائی کیا تھا۔
