اردوورلڈ کینیڈا ( ویب نیوز)ایف بی آر نے رواں مالی سال کے پہلے مہینے میں 16.6 فیصد اضافے کے ساتھ ہدف سے زیادہ خالص ٹیکس وصولی حاصل کرلی ہے، ایف بی آر کی جانب سے ٹیکس دہندگان کو کل 49 ارب روپے کے ریفنڈز جاری کیے گئے ہیں۔

ایف بی آر کے مطابق ملک کو درپیش معاشی چیلنجز کے باوجود ایف بی آر نے کامیابی کے ساتھ جولائی 2023 کے ہدف سے زیادہ رقم اکٹھی کی ہے جو کہ گزشتہ سال اسی مہینے میں جمع ہونے والے ریونیو سے 16.6 فیصد زیادہ ہے۔ 49 ارب روپے کے ریفنڈز جاری کرنے کے باوجود جولائی 2023 میں 534 ارب روپے کے ہدف کے مقابلے میں 538 ارب روپے کے خالص محصولات اکٹھے کیے گئے۔
ایف بی آر نے بتایا کہ رواں ماہ کے دوران جمع ہونے والے براہ راست ٹیکسوں میں گزشتہ سال جولائی کے مقابلے میں 30 فیصد کا نمایاں اضافہ دیکھا گیا ہے، اس ماہ کے دوران ان لینڈ ریونیو ٹیکسز میں 18 فیصد اضافہ ہوا ہے۔ ٹیم کو توقع ہے کہ اس نمو کا نمونہ باقی سال میں برقرار رہے گا۔