اردوورلڈ کینیڈا ( ویب نیوز )توشہ خانہ کیس میں چیئرمین پی ٹی آئی کی اہلیہ بشریٰ بی بی کی عبوری ضمانت میں توسیع کردی گئی۔اسلام آباد کی ڈسٹرکٹ اینڈ سیشن عدالت میں بشریٰ بی بی کے خلاف توشہ خانہ کیس کی سماعت ایڈیشنل سیشن جج طاہر عباس سپرا نے کی۔

بشریٰ بی بی وکلا سلمان صفدر، انتظار پنجوٹھا اور نعیم پنجوٹھہ کے ہمراہ عدالت میں پیش ہوئیں، اس موقع پر تفتیشی افسر نے عدالت میں بیان دیا کہ وہ سابق خاتون اول کی گرفتاری چاہتے ہیں۔

تفتیشی افسر نے بتایا کہ بشریٰ بی بی کی آڈیو فرانزک کے لیے ایف آئی اے کو بھیج دی گئی ہے۔

وکیل صفائی نے کہا کہ انہیں بلا کر 3 گھنٹے بٹھایا جاتا ہے، تفتیش کے دوران یہ بھی بتایا گیا کہ مذکورہ آڈیو بشریٰ بی بی کی نہیں ہے۔

عدالت نے استفسار کیا کہ معاملہ رسیدوں کا ہے تو آڈیو کہاں سے آئی؟ ایف آئی آر کے مطابق کیس کو آگے بڑھائیں۔

تفتیشی افسر نے کہا کہ عدالت سے استدعا ہے کہ بشریٰ بی بی کی وائس میچنگ کے لیے وقت دیا جائے، عدالت نے تفتیشی افسر کی استدعا منظور کرلی۔

عدالت نے بشریٰ بی بی کی عبوری ضمانت میں 12 ستمبر تک توسیع کرتے ہوئے کیس کی سماعت ملتوی کردی۔