اردوورلڈ کینیڈا ( ویب نیوز )لاہور سمیت پنجاب کے مختلف علاقوں میں موسلادھار بارش کے باعث نشیبی علاقے زیرآب آگئے۔
لکشمی چوک، ایبٹ روڈ، گلبرگ، جیل روڈ، گارڈن ٹاؤن اور کاہنہ موسلا دھار بارش سے بھیگ گئے، چونگی امرسدھو، کینچی، تاج پورہ، والٹن، فیروز پور روڈ، ریلوے اسٹیشن، شاہدرہ، اچھرہ میں بھی جم کر بارش ہوئی۔ .
مغلپورہ، مصطفی آباد، نیلہ گنبد، کوئینز روڈ، سمن آباد، راج گڑھ، شاد باغ، جلو پارک، محمود بوٹی، گڑھی شاہو، قلعہ گجر سنگھ اور دیگر مقامات پر بارش سے موسم خوشگوار ہو گیا۔
رات گئے شروع ہونے والی موسلادھار بارش سے شہر کے نشیبی علاقے زیرآب آگئے، بیشتر علاقوں میں بارش کا پانی گھروں میں داخل ہوگیا جس سے علاقہ مکینوں کو شدید مشکلات کا سامنا ہے۔
بجلی کی ترسیل کا نظام متاثر ہونے سے کئی علاقوں میں بجلی غائب ہو گئی جس سے شہریوں کو مشکلات کا سامنا کرنا پڑا۔
اس کے علاوہ پنجاب کے دیگر شہروں کاہانہ، اوکاڑہ، دیپالپور، ننکانہ صاحب، بہاولنگر، گوجرانوالہ، قصور، شیخوپورہ، پتوکی، ساہیوال، کامونکی، میانوالی، منڈی بہاؤالدین، نارووال اور پسرور میں بھی بارش ہوئی۔
دوسری جانب پراونشل ڈیزاسٹر مینجمنٹ اتھارٹی (پی ڈی ایم اے) کا کہنا ہے کہ مشرقی ہواؤں سے بارشوں کا نیا سسٹم بلوچستان میں داخل ہوگیا، صوبے کے مشرقی، شمالی اور وسطی اضلاع میں آج بارش ہوگی، ژوب، بارکھان، سبی، خضدار، قلات۔ لسبیلہ اور آواران میں بارش کا امکان ہے۔
محکمہ موسمیات نے کہا ہے کہ بارشوں کا یہ سلسلہ 20 ستمبر تک جاری رہے گا، تیز بارش سے کچے مکانات، بجلی کے کھمبے، سولر پینلز کو نقصان پہنچ سکتا ہے۔
