اردوورلڈکینیڈا( ویب نیوز)پنجاب میں شہریوں کو جعلی ای چالان SMS موصول ہونے کی شکایات سامنے آئی ہیں، جس پر سیف سٹی نے عوام کو خبردار کیا ہے کہ وہ جعلسازوں کے جھانسے میں نہ آئیں۔

سیف سٹی کے ترجمان کے مطابق، سرکاری ادارہ کبھی بھی SMS کے ذریعے کسی شہری سے کیش، بینک یا اکاؤنٹ کی تفصیلات طلب نہیں کرتا۔ ای چالان SMS صرف اور صرف پنجاب حکومت کے سرکاری نمبر 8070 سے بھیجے جاتے ہیں۔

حکام کا کہنا ہے کہ جعلساز شہریوں کو لنکس پر کلک کروانے کی کوشش کرتے ہیں تاکہ پیسے لوٹے جا سکیں، اس لیے شہری کسی بھی مشکوک SMS یا ویب سائٹ پر ادائیگی نہ کریں۔ سیف سٹی کی تمام سروسز شہریوں کے لیے مکمل طور پر مفت ہیں۔

ترجمان نے مزید کہا کہ مشکوک یا جعلی میسج موصول ہونے کی صورت میں فوری طور پر 15 یا FIA سائبر ونگ سے رابطہ کیا جائے۔ ای چالان SMS میں ہمیشہ وقت، جگہ اور خلاف ورزی کی تفصیل فراہم کی جاتی ہے۔سیف سٹی نے واضح کیا کہ اس کے نام پر فراڈ کرنے والوں کے خلاف سخت قانونی کارروائی کی جائے گی تاکہ شہریوں کو تحفظ فراہم کیا جا سکے۔