صوبائی دارالحکومت کے مختلف علاقوں گڑھی شاہو، ایبٹ روڈ، کینال روڈ، دھرم پورہ، لکشمی چوک، نسبت روڈ، کاہانہ، گجومٹہ، فیروز پور روڈ، ساندہ، کرشنا نگر، بند روڈ، اچھرہ، چونگی امرسدھو، کلمہ میں بارش ہوئی۔
شہر کا کم سے کم درجہ حرارت 16 اور زیادہ سے زیادہ 23 ڈگری سیلسیس رہنے کا امکان ہے۔ بارش کی وجہ سے فضائی آلودگی میں بھی نمایاں کمی متوقع ہے۔
اس کے علاوہ پنجاب کے دیگر شہروں اوکاڑہ، ساہیوال، عارف والا، بہاولنگر، نارووال، گوجرہ، جھنگ، ٹوبہ ٹیک سنگھ، سانگلہ ہل میں بھی موسلادھار بارش ہوئی۔
بارش کے باعث مختلف علاقوں میں فیڈر ٹرپ ہونے سے بجلی کی فراہمی معطل ہوگئی۔
دوسری جانب محکمہ موسمیات نے آج بلوچستان کے مختلف اضلاع میں تیز ہواؤں اور گرج چمک کے ساتھ بارش کی پیشگوئی کی ہے۔
بلوچستان میں محکمہ موسمیات کے مطابق گزشتہ 24 گھنٹوں کے دوران لسبیلہ میں 28 ملی میٹر، کوئٹہ میں 2 ملی میٹر، قلات میں 1 ملی میٹر بارش ریکارڈ کی گئی جب کہ دالبندین میں بھی بادل برسے۔
محکمہ موسمیات کے مطابق آج صوبے کے بیشتر اضلاع میں مطلع جزوی طور پر ابر آلود رہے گا تاہم زیارت، خضدار، لسبیلہ، ژوب، بارکھان، آواران اور تربت میں گرج چمک کے ساتھ بارش کا امکان ہے۔
