اردوورلڈ کینیڈا( ویب نیوز)بھارت نے دریائے ستلج میں بڑھتی ہوئی پانی کی سطح کے باعث پاکستان کو 24 گھنٹوں کے اندر دوسری مرتبہ سفارتی سطح پر آگاہ کیا ہے۔
وزارتِ آبی وسائل کے مطابق بھارتی ہائی کمیشن نے اطلاع دی ہے کہ دریائے ستلج میں انتہائی اونچے درجے کے سیلاب کا خطرہ ہے۔ ہر یک اور فیروز پور کے مقامات پر پانی کی سطح میں غیر معمولی اضافہ متوقع ہے، جو 4 ستمبر کو عروج پر پہنچ سکتا ہے۔
اس صورتحال کے پیش نظر وزارتِ آبی وسائل نے 28 اہم محکموں کو الرٹ جاری کر دیا ہے اور سیلابی خطرات سے نمٹنے کے لیے اقدامات کرنے کی ہدایت دی ہے۔
یاد رہے کہ گزشتہ روز بھی بھارت کی جانب سے دریائے ستلج کی ممکنہ سیلابی صورتحال پر پاکستان کو سفارتی رابطے کے ذریعے آگاہ کیا گیا تھا، جس کے بعد پاکستانی حکام نے فیروز پور کے مقام پر انتہائی اونچے درجے کے سیلاب کا خدشہ ظاہر کرتے ہوئے ہنگامی الرٹ جاری کیا تھا۔
اس سے قبل 25 اگست کو بھارت نے سندھ طاس معاہدے پر عمل کیے بغیر پہلی بار مئی کی جنگ کے بعد پاکستان سے باضابطہ رابطہ کرتے ہوئے دریائے توی میں جموں کے مقام پر ممکنہ بڑے سیلاب کی پیشگی اطلاع بھی دی تھی۔ بھارتی ہائی کمیشن اسلام آباد نے حکومتِ پاکستان کو اس صورتحال سے آگاہ کیا، جس پر حکومت نے فوری طور پر الرٹ جاری کیا تھا۔
