اردو ورلڈ کینیڈا ( ویب نیوز ) بنگلہ دیش میں قائم عبوری حکومت کے نامزد سربراہ ڈاکٹر محمد یونس نے بھارتی میڈیا سے گفتگو میں بھارت کو اپنی خارجہ پالیسی تبدیل کرنے کا مشورہ دیا۔بنگلہ دیش حکومت کے سربراہ نوبل انعام یافتہ پروفیسر ڈاکٹر محمد یونس نے پیرس میں بھارتی میڈیا کو خصوصی انٹرویو دیتے ہوئے کہا کہ بنگلہ دیش میں غلط لوگوں کے ساتھ بھارت کے اچھے تعلقات ہیں۔ڈاکٹر محمد یونس آج کسی بھی وقت پیرس سے ڈھاکہ پہنچ کر عبوری حکومت کی ذمہ داریاں سنبھالیں گے جب کہ ملک میں فوری طور پر نئے انتخابات بھی متوقع ہیں۔
گزشتہ ایک ماہ سے جاری پرتشدد مظاہروں اور شیخ حسینہ واجد کے وزارت عظمیٰ سے مستعفی ہونے کے بعد ملک میں زندگی معمول پر آنا شروع ہو گئی ہے۔اطلاعات کے مطابق تعلیمی ادارے کھل گئے، صنعتی علاقوں میں گارمنٹس فیکٹریوں میں کام دوبارہ شروع ہوگیا، سڑکوں پر ٹریفک بھی رواں دواں ہے جب کہ مختلف علاقوں میں طلباء کی جانب سے صفائی کا کام بھی جاری ہے۔
