اردو ورلڈ کینیڈا ( ویب نیوز ) کینیڈا کے صوبے اونٹاریو میں ایک بھارتی شہری کو اسکول کی طالبات کو ہراساں کرنے کے الزام میں ملک بدر کر دیا گیا ہے۔
مقامی عدالت نے 51 سالہ جگجیت سنگھ پر دوبارہ کینیڈا میں داخلے پر پابندی بھی عائد کر دی۔ رپورٹس کے مطابق جگجیت سنگھ 6 ماہ کے ویزے پر جولائی میں اپنے نومولود پوتے سے ملنے کے لیے کینیڈا آیا تھا۔ تاہم وہاں پہنچنے کے کچھ ہی عرصے بعد وہ ایک ہائی اسکول کے باہر موجود اسموکنگ ایریا میں نوجوان لڑکیوں کے قریب آنے لگا، ان کے ساتھ تصاویر لینے کی کوشش کرتا اور غیر مناسب گفتگو کرتا رہا۔
8 سے 11 ستمبر کے دوران جگجیت سنگھ نے متعدد بار طالبات کے قریب جا کر انہیں ہراساں کیا اور اسکول کی حدود سے باہر بھی پیچھا کیا۔ ایک طالبہ نے پولیس کو بتایا کہ شروع میں وہ تصویر کھنچوانے کے لیے راضی نہیں تھی، لیکن امید کی کہ شاید وہ پیچھا چھوڑ دے گا، مگر جگجیت سنگھ نے تصویر لیتے وقت نہایت قریب آ کر اس کے کندھے پر ہاتھ رکھا، جس سے وہ شدید خوفزدہ ہو گئی۔ 16 ستمبر کو پولیس نے جگجیت سنگھ کو گرفتار کیا اور جنسی طور پر ہراساں کرنے اور دیگر الزامات کے تحت مقدمہ درج کیا۔ ضمانت پر رہائی کے بعد ایک اور شکایت پر اسے دوبارہ گرفتار کیا گیا، اور عدالت میں اس نے اسکول کی طالبات کو ہراساں کرنے کا اعتراف بھی کیا۔ عدالت نے کہا کہ اسکول کی حدود میں اس کا داخل ہونا کسی بھی طرح جائز نہیں تھا اور ایسے رویے کو کسی صورت قبول نہیں کیا جا سکتا۔ عدالت کے حکم کے مطابق جگجیت سنگھ کو فوری طور پر کینیڈا سے ملک بدر کیا گیا اور آئندہ داخلے پر پابندی عائد کر دی گئی ہے۔
