اردوورلڈ کینیڈا( ویب نیوز)ایک بھارتی مسافر طیارے کو دو طرفہ بنیادوں پر کراچی کے جناح انٹرنیشنل ایئرپورٹ پر اترنے کی اجازت دی گئی۔
ایوی ایشن ذرائع کے مطابق بھارتی شہر دہلی سے جدہ جانے والی انڈین ایئر لائن کی پرواز کو کراچی میں میڈیکل ایمرجنسی لینڈنگ کی اجازت دی گئی۔
ذرائع نے بتایا کہ انڈین ائیرلائن کی پرواز دہلی سے جدہ جا رہی تھی کہ پاکستانی فضائی حدود میں ایک مرد مسافر بیمار ہو گیا۔ پرواز کے عملے نے مسافر کو آکسیجن فراہم کی لیکن جب ان کی حالت خراب ہوئی تو پائلٹ نے کراچی ایئر ٹریفک کنٹرول سے رابطہ کیا۔
بھارتی پائلٹ نے کراچی ایئر ٹریفک کنٹرول سے انسانی ہمدردی کی بنیاد پر کراچی میں میڈیکل ایمرجنسی لینڈنگ کی اجازت طلب کی۔ اجازت ملنے پر پائلٹ نے طیارے کا رخ کراچی کی طرف کیا اور جناح انٹرنیشنل ایئرپورٹ پر لینڈ کیا۔
حکام کا مزید کہنا تھا کہ طیارے کے لینڈ ہونے کے بعد پاکستان سول ایوی ایشن اتھارٹی کی ایک طبی ٹیم جہاز پر گئی اور مسافر کو طبی امداد فراہم کی۔
