اردوورلڈکینیڈا( ویب نیوز)اسلام آباد کی ڈسٹرکٹ اینڈ سیشن کورٹس نے بانی پاکستان تحریکِ انصاف (پی ٹی آئی) کے خلاف 9 مئی اور دیگر پانچ مقدمات کی آئندہ سماعت پر انہیں عدالت میں یا ویڈیو لنک کے ذریعے پیش کرنے کی ہدایت کی ہے۔

ایڈیشنل سیشن جج محمد افضل مجوکا نے بانی پی ٹی آئی کے خلاف درج مقدمات کی سماعت کی، جس میں عدالت نے بانی پی ٹی آئی اور بشریٰ بی بی کی عبوری ضمانت کی درخواستوں کی مدت میں 6 فروری تک توسیع کر دی۔

بانی پی ٹی آئی کو عدالت میں ویڈیو لنک کے ذریعے پیش نہیں کیا جا سکا، جس کے باعث ضمانت کی درخواستوں پر دلائل نہیں ہو سکے اور سماعت آئندہ تاریخ تک ملتوی کر دی گئی۔

بانی پی ٹی آئی کے خلاف درج مقدمات میں 9 مئی کے واقعے، اقدام قتل، جعلی رسیدوں اور دیگر الزامات شامل ہیں۔ بشریٰ بی بی کے خلاف بھی مبینہ جعلی رسیدیں جمع کروانے پر مقدمہ درج ہے۔

عدالت کی اس ہدایت کے بعد آئندہ سماعت میں بانی پی ٹی آئی یا ان کے قانونی نمائندے ضمانت کی درخواستوں کے سلسلے میں دلائل پیش کریں گے۔