اردوورلڈ کینیڈا ( ویب نیوز )انسداد دہشت گردی کی عدالت نے چیئرمین پی ٹی آئی کی جناح ہاؤس کیس سمیت 7 مقدمات میں عبوری ضمانتیں مسترد کر دیں۔
لاہور کی انسداد دہشت گردی کی عدالت کے جج اعجاز احمد بٹر نے سماعت کی، پی ٹی آئی کی جانب سے اسپیشل پراسیکیوٹر سید فرہاد علی شاہ اور بیرسٹر سلمان صفدر عدالت میں پیش ہوئے۔
بیرسٹر سلمان صفدر نے درخواست ضمانت ملتوی کرنے کی استدعا کی، انہوں نے کہا کہ قانونی نکتے پر تفتیش کے لیے 3 دن کا وقت دیا ہے، عدالت یا پراسیکیوٹر مزید وقت دینے کی مخالفت کریں گے تو دلائل دوں گا۔

انہوں نے کہا کہ تکنیکی بنیادوں پر چیئرمین تحریک انصاف کی عبوری ضمانت منسوخ نہ کی جائے، انہوں نے یہ بھی کہا کہ عدالتی احکامات پر حراست میں لیے گئے اور سزا یافتہ ملزمان کو روزانہ پیش کیا جاتا ہے، درخواست گزار کو بھی جیل سے طلب کیا جائے۔
ان دلائل سننے کے بعد فاضل جج نے کہا کہ مجرم پیش نہیں ہوتے۔
بیرسٹر سلمان صفدر نے کہا کہ میں چاہتا ہوں کہ 50 اوور پراسیکیوشن اور ڈیفنس سائیڈ کو کھیلنے کا یکساں موقع دیا جائے، بارش کا بہانہ بنا کر میرے موکل کو کھیلنے کا موقع نہ دینا مناسب نہیں ہوگا۔
انہوں نے یاد دلایا کہ سپریم کورٹ نے پی ٹی آئی چیئرمین کو 24 اگست تک کسی نئے کیس میں گرفتار نہ کرنے کا حکم دیا ہے۔
انہوں نے کہا کہ چیئرمین پی ٹی آئی اس عدالت میں پیش ہونا چاہتے ہیں۔
معزز جج نے بیرسٹر سلمان صفدر کو جواب دیتے ہوئے کہا کہ جب آپ کے موکل باہر تھے تو وہ عدالت میں نہیں آئے، آپ نے کسی ایم پی اے، ایم این اے کے پروڈکشن آرڈر جاری نہیں کئے۔
اس بحث پر اسپیشل پراسیکیوٹر سید فرہاد علی شاہ نے کہا کہ ایسا کوئی قانونی طریقہ کار نہیں ہے جس کے تحت سزا یافتہ شخص کو عبوری ضمانت کے لیے عدالت میں پیش کیا جاسکے۔
جج اعجاز احمد بٹر نے کہا کہ ہم مجرم کا ٹرائل جیل میں کرتے ہیں۔
اسپیشل پراسیکیوٹر سید فرہاد علی شاہ نے کہا کہ ملزم عدالت میں پیش نہ ہونے کی صورت میں درخواست عدم پیروی پر خارج کر دی جاتی ہے اور اس بنیاد پر قوی امکان ہے کہ ملزم کی سزا دو دن بعد معطل ہو جائے، یہ جواز مناسب نہیں ہے.
انہوں نے کہا کہ عدالت عدم تعمیل پر درخواست خارج کر دیتی ہے، جب ملزم کی سزا معطل ہو جاتی ہے تو وہ جیل سے باہر آنے پر عبوری ضمانت کا حقدار ہو گا۔