اردو ورلڈ کینیڈا ( ویب نیوز )قومی احتساب بیورو (نیب) نے پاکستان تحریک انصاف سے تعلق رکھنے والے خیبرپختونخوا کے دو سابق وزرائے اعلیٰ کے خلاف مبینہ کرپشن کی تحقیقات شروع کر دی ہیں۔
نیب ذرائع کے مطابق کنگ عبداللہ ٹیچنگ ہسپتال مانسہرہ میں چھاپے کے دوران محکمہ صحت کا سابقہ ​​ریکارڈ چیک کیا گیا جس میں ادویات اور سامان کی خریداری میں کروڑوں روپے کی بے ضابطگیوں کے شواہد ملے۔

نیب 2016 سے 2023 تک کی خریداری اور سالانہ بجٹ کی تحقیقات کر رہا ہے۔
ذرائع کے مطابق ابتدائی تحقیقات میں ادویات اور دیگر سامان کی خریداری میں بے ضابطگیوں کے شواہد ملے ہیں، تنخواہوں کی مد میں کروڑوں روپے جبکہ ادویات کی مد میں لاکھوں روپے رکھے گئے ہیں۔
نیب ذرائع کا کہنا ہے کہ دو سابق وزرائے اعلیٰ کے دور میں کورونا میں استعمال کے لیے خریدے گئے آلات، بھرتیوں اور آلات کے حوالے سے بھی تحقیقات کی جا رہی ہیں، تحقیقات مکمل ہونے کے بعد ریفرنس دائر کیا جائے گا۔