اردوورلڈکینیڈا( ویب نیوز)ایران نے اعلان کیا ہے کہ وہ مصر کے شہر شرم الشیخ میں ہونے والے غزہ امن سربراہی اجلاس میں شرکت نہیں کرے گا۔ ایرانی وزیرِ خارجہ عباس عراقچی نے واضح کیا کہ ایران ایسے ممالک کے ساتھ ایک میز پر نہیں بیٹھ سکتا جو اس کے عوام پر حملے اور دھمکیاں دے چکے ہیں۔

عباس عراقچی نے سوشل میڈیا پلیٹ فارم ایکس (X) پر اپنے بیان میں کہا کہ اگرچہ ایران کو اجلاس میں شرکت کی دعوت دی گئی تھی، لیکن ایرانی صدر اور وزیرِ خارجہ دونوں نے شرکت سے انکار کر دیا ہے۔ ان کے مطابق، “ہم ان ممالک سے بات چیت نہیں کر سکتے جنہوں نے ایرانی عوام کو پابندیوں اور حملوں کا نشانہ بنایا ہے۔”

یاد رہے کہ جون 2025 میں اسرائیل نے ایران کے میزائل ذخائر اور لانچنگ سائٹس پر حملے کیے تھے، جس کے جواب میں ایران نے وسطی اسرائیل پر میزائل اور ڈرون حملے کیے، جب کہ امریکہ نے تہران کی جوہری تنصیبات کو نشانہ بنایا تھا۔

غزہ میں جاری جنگ بندی سے متعلق عباس عراقچی نے کہا کہ ایران ہر اس کوشش کی حمایت کرتا ہے جو اسرائیلی جارحیت کے خاتمے اور قابض افواج کے انخلا کو یقینی بنائے۔

انہوں نے مزید کہا کہ ایران “خطے میں امن کے قیام کے لیے ایک مؤثر اور فیصلہ کن کردار ادا کرتا رہا ہے اور آئندہ بھی کرتا رہے گا۔”