اردو ورلڈ کینیڈا ( ویب نیوز )اسلام آباد کی ضلعی انتظامیہ نے پاکستان تحریک انصاف کو جلسے اور دھرنے کی اجازت دینے سے انکار کر دیا۔اسلام آباد ہائی کورٹ میں ایڈووکیٹ جنرل کی جانب سے متفرق درخواست دائر کی گئی۔ ضلعی انتظامیہ کا موقف ہے کہ عمران خان کی جان کو لاحق شدید خطرات کے پیش نظر وہ جلسے یا دھرنے کی اجازت نہیں دے سکتے۔ وزیرآباد میں عمران خان کے کنٹینر پر حملہ کیا گیا حملہ آور نے اپنے اعترافی بیان میں مذہبی رجحانات کا ذکر کیا ہے۔ حملہ آور کے تحریری اعترافی بیان کو بھی درخواست کا حصہ بنایا گیا ہے۔
انتظامیہ کا موقف ہے کہ حملہ آور نے اپنے اعترافی بیان میں مذہبی رجحانات کا ذکر کیا ہے۔ خدشہ ظاہر کیا جا رہا ہے کہ ایسے مذہبی جنونی جلسے میں داخل ہو کر ایسی حرکتیں دہر اسکتے ہیں۔ اسلام آباد میں اس سے پہلے بھی ایسے پرتشدد واقعات ہو چکے ہیں جن میں سلمان تاثیر اور شہباز بھٹی کا قتل بھی شامل ہے۔
انتظامیہ کا مزید کہنا ہے کہ فواد چوہدری سمیت پی ٹی آئی کے دیگر رہنما دھمکیاں دے رہے ہیں۔ سیکیورٹی اداروں کی جانب سے اطلاعات ہیں کہ عمران خان کی جان کو شدید خطرہ ہے۔ اس صورتحال میں پی ٹی آئی کو جلسے یا دھرنے کی اجازت نہیں دی جا سکتی۔
اسلام آباد کی ضلعی انتظامیہ نے عدالت سے تحریک انصاف کی درخواست خارج کرنے کی استدعا کی۔
65
