11
اردوورلڈ کینیڈا( ویب نیوز)اسلام آباد کی سیشن عدالت نے وزیراعلیٰ خیبر پختونخوا علی امین گنڈاپور کے خلاف شراب اور اسلحہ برآمدگی کیس میں وارنٹ گرفتاری جاری کر دیے۔ عدالت نے ان کے وکیل کی جانب سے وارنٹ معطل کرنے کی درخواست بھی مسترد کر دی۔
اطلاعات کے مطابق جوڈیشل مجسٹریٹ مبشر حسن چشتی نے یہ حکم اس وقت جاری کیا جب علی امین گنڈاپور یا ان کی نمائندگی کے لیے کوئی شخص عدالت میں پیش نہ ہوا۔ عدالت نے حکم دیا ہے کہ ملزم کو گرفتار کر کے 17 ستمبر کو پیش کیا جائے۔
بعد ازاں ان کے وکیل راجہ ظہور الحسن عدالت پہنچے اور مؤقف اختیار کیا کہ وارنٹ جاری ہونے سے میڈیا پر سبکی ہوئی ہے، تاہم عدالت نے مؤقف مسترد کرتے ہوئے کہا کہ اگر ملزم پیش ہو جائے تو وارنٹ منسوخ کیے جا سکتے ہیں۔
یاد رہے کہ اس سے قبل بھی 19 جولائی 2025 کو ڈسٹرکٹ اینڈ سیشن کورٹ اسلام آباد نے اسی مقدمے میں ناقابل ضمانت وارنٹ گرفتاری جاری کرتے ہوئے علی امین گنڈاپور کو عدالت میں پیش کرنے کا حکم دیا تھا۔
