اردوورلڈ کینیڈا ( ویب نیوز)اسلام آباد ہائی کورٹ نے انسانی حقوق کی وکیل ایمان مزاری کو کسی بھی مقدمے میں گرفتار کرنے سے روک دیا۔اسلام آباد ہائی کورٹ میں جسٹس میاں گل حسن اورنگزیب نے ایمان مزاری کے مقدمات کی تفصیلات اور حفاظتی ضمانت کی درخواست پر سماعت کی۔ جسٹس میاں گل حسن اورنگزیب نے دو صفحات پر مشتمل تحریری حکم نامہ جاری کیا۔

حکم نامے میں عدالت نے کہا کہ سیکرٹری، آئی جی، ڈی جی ایف آئی ایمان مزاری کو گرفتار نہیں کریں گے۔
عدالت نے ریمارکس دیئے کہ سیکرٹری داخلہ، پولیس اور ایف آئی اے کسی صوبے کی گرفتاری میں مدد نہیں کریں گے، ایمان مزاری کو اسلام آباد کی حدود سے باہر نہ لے جانے کو یقینی بنائیں۔
حکم نامے کے مطابق سیکرٹری داخلہ ایمان مزاری کے خلاف مقدمات سے آگاہ کریں، ایس ایس پی آپریشنز کے مطابق ایمان مزاری کے خلاف اسلام آباد میں تین مقدمات درج ہیں۔
عدالت نے کہا کہ اسلام آباد پولیس کے مطابق ایمان مزاری اسلام آباد میں دوسرے مقدمے میں ضمانت پر ہیں، درخواست گزار کی والدہ نے کہا کہ تیسرے مقدمے میں ضمانت نہ ہونے پر دوبارہ گرفتاری کا خدشہ ہے، عدالت سے استدعا کی گئی کہ حکم دیا جائے۔