اردو ورلڈ کینیڈا ( ویب نیوز)اسلام آباد ہائی کورٹ نے پاکستان تحریک انصاف عمران خان کی مبینہ بیٹی ٹیریان جیڈ کے کیس کی سماعت کے لیے لارجر بینچ تشکیل دینے کا فیصلہ کیا ہے۔

اسلام آباد ہائی کورٹ کے چیف جسٹس عامر فاروق نے مبینہ طور پر بیٹی ٹیریان ظاہر نہ کرنے پر عمران خان کی نااہلی کی درخواست پر سماعت کی۔

چیف جسٹس عامر فاروق نے ریمارکس دئیے کہ عمران خان کا اعتراض ہے کہ وہ اب پبلک آفس ہولڈر نہیں رہے، انہیں الیکشن کمیشن سے تصدیق کرنی ہوگی کہ موجودہ پوزیشن کیا ہے، الیکشن کمیشن سے ڈی نوٹیفکیشن کا نوٹیفکیشن طلب کر ینگے ۔

چیف جسٹس عامر فاروق نے کہا کہ درخواست گزار نے عمران خان کے 2018 کے حلف نامے کو چیلنج کیا تھا۔

اسلام آباد ہائی کورٹ نے ٹیریان جیڈ کیس کی سماعت کے لیے لارجر بینچ بنانے کا فیصلہ سنا دیا۔

یاد رہے کہ گزشتہ روز چیئرمین تحریک انصاف عمران خان نے اپنی مبینہ بیٹی ٹیریان سے متعلق کیس میں عدالت میں تحریری جواب جمع کرایا تھا، جس میں انہوں نے کہا تھا کہ اسلام آباد ہائی کورٹ اس کیس کو سننے کی مجاز نہیں ہے۔ .

عمران خان نے اپنے تحریری جواب میں یہ بھی کہا کہ جس جج نے پہلے یہ کیس سننے سے معذرت کر لی وہ دوبارہ کیس کیسے سنیں گے۔